سەدر داوای ئازادکردنی بەندکراوانی رەوتەکەی دەکات

 

موقتەدا سەدر، رێبەری رەوتی سەدر، لە بڵاوکراوەیەکدا لە هەژماری خۆی لەسەر تۆڕی کۆمەڵایەتی ئێکس رایگەیاند: "لەگەڵ نزیکبوونەوەی ساڵڕۆژی شەهیدبوونی ئیمام موسای کوڕی جەعفەر (رۆحم بە قوربانی بێت) کە لە کونجی گرتووخانەکانی حکومەتی بەنی عەباس کوژرا، پێموایە لە بەرژەوەندیی گشتییە ئەو گرتووانەی کە پێیاندەگوترێت گرتووەکانی رەوتی سەدری ئازاد بکرێن."

 

موقتەدا سەدر، دەشڵێت: "ئەو گرتووانە یان بەندکراوی موقاوەمەن و دەسەڵاتی ئێستا بانگەشەی مقاوەمەت دەکات، ئەوە پێویست ناکات لە گرتووخانە بمێننەوە. یان بێتاوانە، ئەوا دەسەڵاتی ئێستا بانگەشەی دادپەروەری دەکات و پێویست بە مانەوەی لە زیندان بکات، ئەگەر تاوانباریش بێت ئەوا بەشێک کە کەم نییە لە ماوەی زیندانیکردنی بەسەربردووە، ئەگەر بەڵێننامەی پڕکردەوە تاوانەکەی دووبارە نەکاتەوە ئەوا پێویستە ئازادبکرێت و لەسەر تەوبەکردن رایدەهێنین، هەوڵیش دەدەین خاوەن ماف لە مافەکانیان خۆش ببن لەگەڵی."

 

موقتەدا سەدر لە کۆتایی بڵاوکراوەکەیدا  داوا دەکەن نزیکترین هەینیی شەهیدبوونی ئیمام بۆ داواکردنی گرتووەکانی رەوتی سەدر بێت.

 

رەوتی سەدر لە دوای رووخانی رژێمی بەعس، لەساڵی 2004 و 2008 و 2009 چووە شەڕی بەردەوام لەگەڵ هێزەکانی ئەمریکا و لیوای یەومی مەوعودی دامەزراند و دواتر بووە سوپای مەهدی کە لەگەڵ حکومەتی عێراقیش بەشەڕهاتن و لە رووداوەکانی 2006 تاوەکو 2008 کە بەجەنگی نێوخۆیی عێراق هەژماردەکرێت، بە سەدان چەکداری کوژران و بەشێکیشیان دەستگیرکران.

 

ئیمام موسای کوڕی جەعفەر، ناسراو بە کازم، حەوتەم ئیمامی شیعەکانە، ئیمامێتییەکەی بەپێی شیعەکان 35 ساڵ بەردەوام بوو و لە ساڵی 183 ـی کۆچی بە ژەهرخواردکردن گیانیلەدەستدا.