سوودانی و شاندێکی کۆنگرێس پەیوەندییەکانی بەغدا و واشنتن تاوتوێ دەکەن

 

ئەلینا رۆمانۆڤسکی، باڵیۆزی ئەمریکا لە عێراق لە تویتێکدا دەڵێت، سەردانی شاندە ئەمریکییەکە "گرنگیدانی واشنتن بە بەهێزکردنی پەیوەندییەکانی ئەمریکا و عێراق، پاراستنی دامەزراوە دیموکراسییەکان و پابەندبوون بە هەوڵەکانی هاوپەیمانیی نێودەوڵەتی بۆ بەردەوامیدان بە تێکشکاندنی داعش پیشاندەدات."

 

هاوکات نوسینگەی راگەیاندنی سەرۆکوەزیرانی عێراق لە راگەیێندراوێکدا باس لەوە دەکات، لە گفتوگۆکانیاندا، سوودانی و شاندەکەی کۆنگرێس باسیان لە پەیوەندییە دووقۆڵیەکانی هەردوو وڵات، شەڕی دژی "تیرۆر" و کاری هێزە ئەمنییەکانی عێراق لە ریشەکێشکردنی شانە نووستووەکانی داعش کردووە.

 

نووسینگەی سەرۆکوەزیرانی عێراق دەشڵێت، لە دیدارەکەیاندا سوودانی و شاندە ئەمریکییەکە "باسیان لە چۆنیەتیی بەهێزکردنی پەیوەندی و هاوبەشی لە بوارە جیاجیاکاندا بە گوێرەی رێککەوتنی ستراتیجی کردووە، لە سەرووی هەموویانەوە لە بواری بەرەنگاربوونەوەی گۆڕانی کەشوهەوا و کەمئاوی."

 

محەممەد شياع سوودانی پەیوەندیی عێراق و ئەمریکای بە گرنگ پیشانی شاندەکە داوە و ئاماژەی بە هەوڵەکانی بەغدا کردووە لە پێناو "دروستکردنی پەیوەندییەکی هاوسەنگ لەگەڵ دەوروبەرە هەرێمییەکەی و نێودەوڵەتییەکەی بە جۆرێک کە سەروەریی نیشتمانیی عێراق پارێزراوبێت و پشتیوانی لە سەقامگیری و ئاساییشی ناوچەکە بکرێت."

 

بەگوێرەی راگەیێندراوە عێراقییەکە، مارک تاکانۆ پیرۆزبایی لە سوودانی کردووە بە بۆنەی دەستبەکاربوونی لە پۆستی سەرۆکوەزیران و بەدەستهێنانی متمانەی پەرلەمانی عێراق. 

 

پێشتر باڵیۆزی ئەمریکا ئاماژەی بەوە کردبوو، یەکێک لە ئامانجەکانی سەردانی شاندە ئەمریکییەکە بەسەرکردنەوەی هێزەکانی ئەمریکا لە عێراق و "پیشاندانی پشتیوانییە بۆ بەزاندنی بەردەوامی داعش لە لایەن هاوپەیمانیی نێودەوڵەتییەوە."

 

رۆژی پێنجشەممە، تاکانۆ کە هاوکات سەرۆکی لیژنەی جەنگاوەرە دێرینەکانی ئەنجوومەنی نوێنەرانی ئەمریکایە، لە تویتێکدا رایگەیاند: "خۆشحاڵبووم بە بەسەربردنی ئەم پشووە لە دەرەوەی وڵات بۆ خزمەتکردن و پێکەوەبوون لەگەڵ ئەندامە ئازاکانی سوپاکەمان کە هەموو رۆژێک لە پێناو بنەماکانی دیموکراسیی ئەمریکا و بەهاکانی ئازادی و یەکسانی، قوربانی دەدەن."

 

تاکانۆ هاوپێچ لەگەڵ تویتەکەی، وێنەی خۆی و سێ ئەندامەکەی دیکەی کۆنگرێسی داناون کە دەردەکەوێت لە کوێت بەشداری لە کەرتکردنی کێکێک و دابەشکردنی خواردن بەسەر سەربازەکانی ئەمریکادا دەکەن.