رووداو دیجیتاڵ
سبەی لیژنەی دارایی پەرلەمانی عێراق، بۆ تاوتوێکردنی خشتەکانی بودجەی 2024، میوانداری تەیف سامی، وەزیری دارایی عێراق دەکات.
رۆژی شەممە، 25-05-2024، جەمال کۆچەر، ئەندامی لیژنەی دارایی پەرلەمانی عێراق بە رووداوی گوت، پێشنیازکراوە کۆبوونەوەکە کاژێر 12:00ـی نیوەڕۆ، یاخود 3:00ـی دوای نیوەڕۆ بکرێ، تێیدا تەیف سامی، وەزیری دارایی و شاندی وەزارەتەکە ئامادە دەبن.
خشتەی بودجەى 2024، 21ى ئایار گەیشتە پەرلەمان، ئەوەش دواى دوو رۆژ لە پەسندکردنى لە ئەنجوومەنى وەزیران.
لە خشتەی بودجەکەدا خەرجیی ئەم ساڵ بە 211 تریلیۆن و 861 مليار و 312 مليۆن و 504 هەزار دينار دانراوە، لەکاتێکدا داهاتى پێشبینیکراو، 147 تریلیۆن و 836 هەزار و 655 ملیۆن و 889 هەزار دینارە، بەوپێیە بڕى کورتهێنانى بودجە دەگاتە 64 تریلیۆن دینار و، زیاتر لە 300 ملیار دینارى کەمترە لە ساڵى رابردوو.
ئەندامەکەی لیژنەی دارایی گوتی، وەزیری دارایی لەبارەی خشتەکانی بودجەی 2024 وەڵامی پرسیاری پەرلەمانتاران دەداتەوە. لەوانە هۆکاری کەمبوونەوەی بودجەی پارێزگاکان و زیادبوونی بودجەی وەزارەتەکان. چۆنییەتی پڕکردنەوەی کورتهێنان کە 64 تریلیۆن دینارە.
دوو هەفتە لە بەردەم پەرلەماندایە بۆ ئەوەى تاوتوێى خشتەى بودجەى 2024 بکات و دەنگى لەسەر بدات، بەوپێیەى لە 9ى حوزەیران پشووى پەرلەمان دەستپێدەکات.
جەمال کۆچەر رایگەیاند، وەزارەتی دارایی ساڵی رابردوو پارەی پرۆژەکانی بۆ زۆربەی پارێزگاکان خەرج نەکردووە، کەچی لە بودجەی 2024دا، پرۆژەی نوێی بۆ پارێزگاکان داناوە بۆ جێبەجێکردن، لەکاتێکدا پاری ساڵی رابردووی خەرج نەکردووە لەوبارەوە پرسیاری لێدەکرێ.
داهاتى خەمڵێندراو لە بودجەى 2024 گەیشتووەتە 144 تریلیۆن و 336 ملیار دینار، پشکى هەرێمى کوردستان زیاتر لە 20 تریلیۆن دینارە.
جەمال کۆچەر، کە هاوکات سەرۆکی فراکسیۆنی یەکگرتووی ئیسلامیی کوردستانە لە پەرلەمانی عێراق، دەڵێت، رەنگە لە کۆبوونەوەکەدا ئەندامانی لیژنەی دارایی پرسیاری هەرێمی کوردستانیش لە وەزیری دارایی بکەن وەک رادەستکردنی داهات و پابەندبوونەکانی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ