رووداو دیجیتاڵ
ئەنجوومەنی وەزیرانی عێراق، دەسەڵاتی دایە سەرۆکی دەستەی وزەی ئەتۆم، گفتوگۆ و رێککەوتن لەگەڵ چین واژۆبکات لەبواری هاوکاریی وزەی ئەتۆم.
ئەمڕۆ سێشەممە، 25-02-2025، محەممەد شیاع سوودانی، سەرۆکایەتیی کۆبوونەوەی ئاسایی ئەنجوومەنی وەزیرانی کرد و تێیدا پێشهاتەکان و جێبەجێکردنی بەرنامەی حکومەت تاوتوێ کران.
بەگوێرەی راگەیێندراوی نووسینگەی سەرۆکوەزیرانی عێراق، لە کۆبوونەوەکەدا ئەنجوومەنی وەزیران ژمارەیەک بڕیاری پەسند و دەرکرد، دیارترینیان:
- رەزامەندی دا لەسەر پڕۆژەیاسای نوێی دەستەی حەشدی شەعبی و رەوانەی پەرلەمانی کرد بۆ دەنگدان.
- سەرۆکوەزیرانی عێراق بڕیاریدا پشت ببەسترێت بە راسپاردەکانی راپۆرتی وەزارەتی ژینگە تایبەت بە چارەسەرکردنی کێشەی پیسبوونی هەوا و بۆگەنی و، ئەنجوومەکەش پەسندی کرد.
- لە چوارچێوەی بەهێزکردنی هاوکاریی نێودەوڵەتی لە وزەی ئەتۆمی ئاشتیخوازانەدا، ئەنجوومەنی وەزیران رەزامەندی دەربڕی لەسەر راسپاردنی وەزیری خوێندنی باڵا و توێژینەوەی زانستی، کە هاوکات سەرۆکی دەستەی وزەی ئەتۆمی عێراقە، بۆ گفتوگۆ و واژۆکردنی رێککەوتنی هاوکاری لەگەڵ چین لەو بوارەدا.
- پاڵپشت بە بڕیاری محەممەد شیاع سوودانی، سەرۆکوەزیران، ئەنجوومەنی وەزیران دەنگی دا لەسەر پێدانی شوقەیەک و پاسپۆرتێکی دیپلۆماسی بە پزیشکی عێراقی محەممەد تاهیر ئەبو رەغیف، وەک رێزلێنانێک بۆ رۆڵی مرۆیی لە جەنگی غەززەدا.
محەممەد شیاع سوودانی، سەرۆکوەزیرانی عێراق یەکشەممە 23-02-2025 پێشوازی لە پزیشکی عێراقی محەممەد تاهیر ئەبو رەغیف کرد، کە ناسناوی "باڵیۆزی مرۆڤایەتی"ی پێداوە.
سوودانی جەختی لە گرنگیی کاری مرۆڤدۆستانە و ئەخلاقیی ئەو پزیشکە کردەوە، کە لە غەززە پێشکێشی کردووە و گوتی، "ئەمەش هەڵوێستێکی شانازییە کە هەموو عێراقییەکان شانازیی پێوە دەکەن و نوێنەرایەتیی ئەو بنەمایانە دەکات، کە گەلەکەمان بەرامبەر بە گەلی فەلەستینی برای خۆی و دۆزە رەواکەی هەڵیگرتووە."
سوودانی فەرمانی دا یەکەیەکی نیشتەجێبوونی لە ناوەڕاستی بەغدا و پاسپۆرتێکی دیپلۆماسی بە پزیشکەکە بدات، وەکو رێزێک بۆ ئەو کارە مرۆییانەی پێشکێشی دانیشتووانی غەززەی کردووە.
هەروەها فەرمانی دا بە دروستکردنی نەخۆشخانەی عێراقی لە غەززە، بۆ خزمەتکردنی خەڵکی فەلەستین و جەختکردنەوە لەسەر هەڵوێستی بنەڕەتی و مرۆڤدۆستانەی عێراق.
محەممەد تاهیر ئەبو رەغیف، پزیشکێکی عێراقی نیشتەجێی بەریتانیایە لە دایکبووی شاری نەجەفە. لە کەرتی غەززە زیاتر لە 300 نەشتەرگەری ئاڵۆزی کردووە لەگەڵ چارەسەرکردنی هەزاران کەسی دیکە.
یەکێک لەوانە چاندنەوەی دەستی منداڵێکی نۆ ساڵان بوو، کە بەهۆی بۆردوومانی ئیسرائیل لە پارێزگای دێر بەلەح لە ناوەڕاستی کەرتی غەززە دەستێکی پەڕی بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ