قەزای روتبە کارەبای بووەتە 24 کاژێری و ناحیەکانی کارەبایان نییە

 

نزیکەی 10 ساڵ بوو قەزای روتبە کارەبای نیشتمانی نەبوو، ئەوەش دوای ئەوەی داعش ساڵی 2014 شارەکەی کۆنترۆڵکرد و دواتر ژێرخانەکەی وێران بوو.

 

رۆژی 21-07-2024، زیاد عەلی فازل، وەزیری کارەبای عێراق گوتی، دوای بەستنەوەی کارەبای ئوردن- عێراق، موەلیدەی تایبەت لە قەزای روتبە هەڵگیرا و ئێستا قەزاکە کارەبای نیشتمانیی بەردەوامی هەیە.

 

لەو بارەوە لەیس شەمەری، بەڕێوەبەری ناحیەی وەلید کە سەر بە قەزاکەیە، رۆژی چوارشەممە 24-07-2024 بە تۆڕی میدیایی رووداوی گوت، بەستنەوەی کارەبای ئوردن و عێراق کەوتوەتە بواری جێبەجێکردنەوە و بەو هۆیەوە ئێستا سەنتەری قەزای روتبە 24 کاژێر کارەبای نیشتمانی هەیە. 

 

لەیس شەممەری دەڵێت، بەڵام ناحیەکانی سەر بە قەزاکە کە بریتین لە وەلید و نخێت کارەبای نیشتمانییان نییە و پشت بە موەلیدە دەبەستن. 

 

قەزای رووتبە گەورەترین قەزای عێراقە لە رووی رووبەرەوە، 300 کیلۆمەتر لە روومادی سەنتەری پارێزگاری ئەنبارەوە دوورە و لەگەڵ ئوردن، سووریا و سعودیە هاوسنوورە.

 

بەڕێوەبەری ناحیەی وەلید گوتیشی، "نزیکەی 80 کلیۆمەتر ماوە کارەبای نیشتمانی بگاتە ناحیەی وەلید و داوای گەیاندنی کارەبای نیشتمانیم بۆ ناحیەکە کردووە، بەڵام بەرپرسانی وەزارەتی کارەبا پێیان راگەیاندووین لەم کاتەدا ئەستەمە و پێویستمان بە نزیکەی 40 ملیۆن دۆلارە."

 

سەبارەت بە ناحیەی نخێب، ئەو بەرپرسە دەڵێت، بڕیارە کارەبای لە سعودیەوە بۆ دابین بکرێ، چونکە لە سنووری سعودیەوە نزیکترە، بۆیە هەر کاتێک کارەبای عێراق و سعودیە پێکەوە بەسترایەوە، کارەبای نخێب بەو جۆرە دابین دەکرێ.