ڤێتێرنەریی زیقار بۆ رووداو: 18 تووشبووی تای خوێنبەربوون تۆمارکراون و سێیان گیانیان لەدەستداوە

 

دکتۆر محەممەد عەزيز مەیاحی، بەڕێوەبەری ڤێتێرنەریی پارێزگای زیقار لە باشووری عێراق، رۆژی دووشەممە 24-06-2024 بە رووداوی گوت "لە سەرەتای ئەم ساڵەوە لە عێراق زیاتر لە 40 تووشبووی تای خوێنبەربوون تۆمارکراون و، 6ـیان گیانیان لەدەستداوە."

 

بەڕێوەبەری ڤێتێرنەری ئەو پارێزگایە دەڵێت: "ئەم ساڵ تاوەکو ئێستا 18 تووشبووی تای خوێنبەربوون لە زیقار تۆمارکراون و سێ کەسیان گیانیان لەدەستداوە. نیوەی تووشبووانیش لە قەزای شەترەی پارێزگاکەن." 

 

دوای زیقار، پارێزگای نەینەوا پلەی دووەمە بە شەش تووشبوو کە یەکێکیان گیانی لەدەستداوە؛ لە بابل چوار تووشبوو تۆمارکراون و یەکێکیان گیانی لەدەستداوە؛ لە بەغدا شەش تووشبوو تۆمارکراون و یەکێکیان گیانی لەدەستداوە. 

 

تای خوێنبەربوون نەخۆشییەکی ڤایرۆسی هاوبەشە لەنێوان مرۆڤ و ئاژەڵ، لە رێگەی گەنەوە بۆ ئاژەڵ بەشێوەیەکی سەرەکی دەگوازرێتەوە؛ ئاژەڵی ماڵی و کێوی وەک گوێزەرەوەی ڤایرۆسەکە بۆ مرۆڤ دادەنرێن؛ بڵاوبوونەوەی ئەم نەخۆشییە لە عێراق نوێ نییە و سەرەتاکەی بۆ ساڵی 1979 دەگەڕێتەوە. 

 

نیشانەکانی نەخۆشیی تای خوێنبەربوون لە مرۆڤدا بەپێی پسپۆڕانی بوارەکە ئەمانەن: سەرئێشە و ئازاری مل و سک، سووربوونەوەی چاو و سەر شان و سنگ، سکچوون و رشانەوە کە خوێنبەربوونی لەگەڵدا دەبێت.