رووداو دیجیتاڵ
شانەی راگەیاندنی ئەمنیی عێراق رایگەیاند بنکەی ئاسمانیی عەین ئەسەد لە رۆژئاوای عێراق کە هێزەکانی سوپای ئەمریکا تێیدا جێگیرکراون ئەمڕۆ بە مووشەک کرایە ئامانج. مووشەکەکەش یەک دانە بووە و لە جۆری کاتیۆشا بووە.
هاوکات عەقید واین مارۆتۆ، گوتەبێژی هاوپەیمانیی نێودەوڵەتیی دژی داعش لە راگەیەندراوێکدا رایگەیاند: "بنکەی ئاسمانیی عەین ئەسەد ئەمڕۆ بە مووشەک بۆردوومان کرا، بەڵام هیچ زیانێکی مرۆیی لێنەکەوتەوە و هەوڵی دیاریکردنی زیانەکانی دیکەش دەکرێت، هەروەها لێکۆڵینەوە بەردەوامە."
هەر ئەمڕۆ سەرچاوەیەکی ئەمنی کە نەیویست ناوی ئاشکرا بکرێت، بە تۆڕی میدیایی رووداوی راگەیاند: "ئەمڕۆ دوو مووشەک لەو ناوچەیەی پارێزگای ئەنبار کەوتنەخوارەوە کە بنکەی ئاسمانیی عەین ئەسەدی تێدایە و هێزەکانی ئەمریکا تێیدا جێگیرکراون، بەڵام تائێستا زیانەکانی کەوتنەخوارەوەی ئەو دوو مووشەکە نەزانراون."
لە ماوەی چەند مانگی رابردوودا چەندەین جار بنکەی عەین ئەسەد و بنکەی ئاسمانیی بەلەد لە پارێزگای سەڵاحەددین بە مووشەک و فڕۆکەی بێفڕۆکەوانی بۆمبڕێژکراو کرانە ئامانج و زیانیان لێکەوتەوە، لە دوا پێشهاتیشدا کۆمپانیای لۆکهید مارتنی ئەمریکی کە لە بنکەی ئاسمانیی بەلەد فڕۆکەکانی ئێف 16ی چاکدەکردەوە و نۆژەنی دەکردەوە هەموو کارمەندانی خۆی لە بنکەکە کشاندەوە، ئاشکراشی کرد ئەو هەنگاوەمان بۆ پاراستنی سەلامەتی کارمەندانمانە.
بەردەوامی ئەو هێرشانە بۆ سەر بنکە سەربازییەکان کە هێزەکان یان بەڵێندەر و کارمەندانی کۆمپانیا ئەمریکییەکانیان تێدایە، هاوکاتە لەگەڵ تۆمەتبارکردنی یەکینەکانی حیزبوڵڵای عێراقی و چەند گرووپێکی چەکداری دیکەی شیعە و نزیک لە ئێران بە ئەنجامدانی ئەو هێرشانە.
بەپێی وەزارەتی بەرگریی ئەمریکا- پێنتاگۆن؛ ژمارەی هێزەکانی ئەمریکا ئێستا لە عێراق 2500 سەربازە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ