رووداو دیجیتاڵ
فەرماندەی هێزەکانی پاسەوانی سنوور سەردانی تورکیا دەکات و لەگەڵ فەرماندەی هێزی زەوینیی تورکیا کۆدەبێتەوە بۆ تاوتوێکردنی کۆنترۆڵکردنی سنووری هاوبەش. بەڕێوەبەری راگەیاندن و پەیوەندییەکانی هێزەکانی پاسەوانی سنووری عێراق دەڵێت، "کۆبوونەوەیەکی گرنگ کراوە."
لە چوارچێوەی بانگهێشتێکی فەرمی لەلایەن تورکیاوە، لیوا محەممەد عەبدولوەهاب سەکر سەعیدی، فەرماندەی هێزەکانی پاسەوانی سنووری عێراق و بە یاوەری ژمارەیەک فەرماندەی هێزەکە سەردانی کۆماری تورکیای کرد .
عەمید حەیدەر کەرخی، بەڕێوەبەری راگەیاندن و پەیوەندییەکانی هێزەکانی پاسەوانی سنووری عێراق بە تۆڕی میدیایی رووداوی راگەیاند، فەرماندەی هێزەکانی پاسەوانی سنووری عێراق لە ئەنقەرە لەگەڵ لیوا سلجوق بیرەقدار ئۆغڵو، فەرماندەی هێزی زەوینی تورکیا و ژمارەیەک لە فەرماندە ئەمنییەکانی تورکیا کۆبووەوە.
بەگوتەی عەمید حەیدەر کەرخی، کۆبوونەوەیەکی "ئەمنیی گرنگ" کرا بۆ تاوتوێکردنی ئاسایشی سنوورە هاوبەشەکانی نێوان هەردوو وڵاتی دراوسێ و ئاڵوگۆڕی زانیاری و هاوئاهەنگیی هاوبەش لە نێوان هەردوولادا.
ئەم سەردانە دوای زنجیرەیەک رێوشوێن دێت، کە لەلایەن فەرماندەیی هێزەکانی پاسەوانی سنووری عێراقییەوە گیراونەتەبەر، بۆ بەهێزکردنی سنووری نێوان عێراق و تورکیا و دابینکردنی تەکنەلۆژیای نوێ بۆ چاودێریکردن و زیادکردنی ژمارەی خاڵەکانی چاودێری.
لەبارەی تووندوتۆڵکردنی سنوورەکان لەگەڵ تورکیا، گوتەبێژی فەرماندەیی هێزەکانی پاسەوانی سنووری عێراق ئاماژە بەوە دەکات "لە سنوورەکانی تورکیادا بنکەی چوار پایەیی دروست دەکەین و کامێرای چاودێری پێشکەوتوو دادەنێین".
گوتەبێژی فەرماندەیی هێزەکانی پاسەوانی سنووری عێراق دەڵێت، "بە کۆی گشتی ئێستا لە سنوورەکانمان لەگەڵ وڵاتانی دراوسێ، زیاتر لە 970 کامێرای چاودێریی پێشکەوتوو دانراون و کامێرای زیاتریش دادەنرێت."
سەبارەت بە سووریا، گوتەبێژی فەرماندەیی هێزەکانی پاسەوانی سنووری عێراق رایگەیاند، "زیاتر لە 300 کیلۆمەتر لە سنوورەکانمان لەگەڵ سووریا دیواری کۆنکرێتی کراوە و ئێستا کار بۆ دانانی دیواری کۆنکرێتی دەکرێت لە 95 کیلۆمەتری دیکەدا، کۆمپانیای دروستکردنی دیوارە کۆنکرێتییەکانیش لە کارکردن بەردەوامە."
عەمید حەیدەر کەرخی دەڵێت، "لە سەروو دیوارە کۆنکرێتییەکانەوە تێلی دڕکدار دانراوە. ئەو ناوچانەش کە ناتوانین دیواریان تێدا دابنێین، خەندەقمان لێداوە و هەندێک ناوچەش تێلبەندی بی ئار سی کراوە."
لەبارەی تووندوتۆڵکردنی سنوورەکان لەگەڵ ئێران، گوتەبێژی فەرماندەیی هێزەکانی پاسەوانی سنووری عێراق دەڵێت، "تاوەکو ئێستا هیچ رێنماییەکمان بۆ دانانی دیواری کۆنکرێتی لە سنوورەکانمان لەگەڵ ئێران پێنەگەیشتووە".
عێراق و هەرێمی کوردستان لەگەڵ ئێران و رۆژهەڵاتی کوردستان هەزار و 420 کیلۆمەتر، لەگەڵ تورکیا و باکووری کوردستان 335 کیلۆمەتر و لەگەڵ سووریا و رۆژئاوای کوردستان 618 کیلۆمەتر سنووری هاوبەشیان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ