رکابەریى یەکێتی و یەکگرتوو کارەکانی لیژنەیەکی پەرلەمانی عێراق پەک دەخات

 

لیژنەى پەیوەندییەکانى دەرەوەى پەرلەمانى عێراق جێگرى یەکەم و دوومى بۆ هەڵبژێردراوە، بەڵام تائێستا بێ سەرۆکە، لەگەڵ ئەوەى لیژنەکانى دیکە لە 8ى شوبات سەرۆک و دوو جێگەکەیان هەڵبژاردن.

 

رکابەرى بۆ بەدەستهێنانى پۆستى سەرۆکى لیژنەکە لەنێوان دوو پەرلەمانتارى کوردە، کە ئەندامى لیژنەکەن کە ئەوانیش، دیلان غەفوور، ئەندامى فراکسیۆنى یەکێتیى نیشتیمانیى کوردستان و موسەننا ئەمین، ئەندامى فراکسیۆنى یەکگرتوویى ئیسلامیى کوردستانن.

 

رۆژی 8ى شوبات دوو گەڕى یەک لەدواى یەکى هەڵبژاردن لەنێو ئەندامانى لیژنەکە کرا، لە هەردووکیاندا موسەننا ئەمین بەدەنگێک لەپێش رکابەرەکەیەوە بووە. 

 

موسەننا ئەمین، ئەندامى لیژنەى پەیوەندییەکانى دەرەوەى پەرلەمانى عێراق بە تۆڕى میدیایی رووداوى گوت: "لەگەڕى یەکەمی دەنگدان پێنج بە شەش دەنگ بووین و لە دووەمیشیان شەش بە حەوت دەنگ بووین، بەڵام سەرۆکایەتیى پەرلەمان دەڵێت، پێویستە بە دەنگى 50 کۆ یەک ئەو پۆستە یەکلابکرێتەوە." 

 

لیژنەى پەیوەندیەکانى دەرەوەى پەرلەمانى عێراق لە 16 ئەندام پێکدێ، بەڵام ئەو رۆژەى هەڵبژاردنەکەى تێدا کراوە، سێ ئەندامیان لە گەشتى دەرەوەى وڵات بوون و ئامادە نەبوون. 

 

بەگوێرەى مادەى 74ى پەیڕەوى ناوخۆى پەرلەمانى عێراق، پێویستە لە ماوەى سێ رۆژ لە پێکهێنانى لیژنەکان سەرۆک و جێگرەکانى بە زۆرینە هەڵبژێردرێن، بەوپێیە دەبێت بەربژێرى سەرۆکى لیژنەى پەیوەندییەکانى دەرەوە نۆ دەنگ بەدەست بهێنێت.

 

موسەننا ئەمین دەڵێت: "دەبووایە لە گەڕى دووەمدا بەزۆینەى  50 کۆ یەک نەبێت و وەک هەڵبژاردنى گەڕى دووەمى سەرۆککۆمار، بەدەنگى زیادە بێت، پێیان راگەیاندووین کە بەم نزیکانە گەڕێکى دیکەى دەنگدان دەکەین، بەڵام دیارینەکراوە کە کەی دەبێت." 

 

لەکۆى 25 لیژنەکەى پەرلەمانى عێراق فراکسیۆنى پارتى دیموکراتى کوردستان، سەرۆکایەتیی لیژنەکانى تەندروستی و یاسایی بەرکەوتووە، یەکێتیش سەرۆکى لیژنەى پەیوەندییەکانى دەرەوە بە پشکى خۆى دەزانێت. 

 

دیلان غەفوور، ئەندامى لیژنەى پەیوەندییەکانى دەرەوە و بەربژێرى یەکێتى بۆ پۆستى سەرۆکى لیژنەکە بە رووداوى گوت: "بەگوێرەى رێککەوتنى سیاسى، سەرۆکى ئەو لیژنەیە پشکی یەکێتییە، ئەگەر رێککەوتنەکە بەوشێوەیە نەبێت، کاریگەریى لەسەر پەیوەندییە سیاسییەکان دەبێت."