کاپتنێکی دەریاوانیی سووریا دەمرێت و تەرمەکەی دەبرێتە بەسرە

 

 

عەقید عەزیز هاشم، بەڕێوەبەری پەیوەندیییەکان و راگەیاندنی پۆلیسی پارێزگای بەسرە، دووشەممە، 23-12-2024، بە تۆڕی میدیایی رووداوی راگەیاند، کاپتنێکی دەریاوانی بە رەچەڵەک سووریایی کە لەسەر کەشتییەکی ئەفریقی بووە، لە نزیک ئاوی هەرێمیی عێراق کۆچی دواییکردووە.

 

بەگوتەی بەڕێوەبەری پەیوەندیییەکان و راگەیاندنی پۆلیسی بەسرە، "هۆکاری مردنەکەی قەزا و قەدەرە، تەرمەکەی بۆ دادپزیشکی گواستراوەتەوە، بە مەبەستی بە دۆکیومێنتکردن و دڵنیابوون لە رووداوەکە".

 

بەڕێوەبەری پەیوەندیییەکان و راگەیاندنی پۆلیسی بەسرە دەڵێت، هەوڵی زۆردراوە لەسەر کەشتییە رزگاربکرێت، بەڵام بێسوود بووە. دوای چوار کاژێر لە مردنەکەی، تەرمەکەی گواستراوەتەوە بەندەری ئوم قەسر لە پارێزگای بەسرە.