پارێزگاری کەرکووک: مەترسیی سەرهەڵدانەوەی داعشمان لەسەر نییە

 

 

 

ئەمڕۆ دووشەممە، 23-12-2024، رێبوار تەها، پارێزگاری کەرکووک بە سەردانێک گەیشتە بەغدا و لەگەڵ هەر یەکە لە محەممەد حەلبووسی، سەرۆکی پارتی تەقەدووم و نووری مالیکی، سەرۆکی هاوپەیمانێتیی دەوڵەتی یاسا کۆبووەوە.

 

دوای کۆبوونەوەکان، رێبوار تەها لە کۆنفرانسێکی رۆژنامەڤانیدا رایگەیاند: ''باسی دۆخی ئێستای کەرکووک و پێداویستییەکانمان کرد، هەردوو بەڕێزان حەلبووسی و مالیکی جەختیان لەوە کردەوە کە پاڵپشتیی حکومەتی خۆجێیی کەرکووک دەکەن''.

 

بەپێی زانیارییەکانی رووداو، ئەندامانی شاندی یاوەری پارێزگاری کەرکووک بریتین لە، یاوس حەمید، جێگری پارێزگار لە پشکی تورکمان، جیهان ئیبراهیم راوێژکاری پارێزگار، ئیبراهیم تەمیم جێگری دووەمی پارێزگار، سەید ئەحمەد، یاریدەدەری پارێزگار. 

 

رێبوار تەها ئاماژەی بەوە کرد، ''هاتنمان بۆ بەغدا بە هەموو پێکهاتەکانەوە، کورد عەرەب و تورکمان، دەرخەری ئەوەیە کە ئەمڕۆ حکومەتی خۆجێیی کەرکووک، حکومەتی هەموو پێکهاتەکانە.''

 

بەگوتەی پارێزگاری کەرکووک، سبەی سێشەممە سەردانەکانیان بەردەوام دەبن و لەگەڵ ژمارەیەک وەزیری حکومەتی فیدراڵیش کۆدەبنەوە، ''ئێمە پێویستیمان بە پارەدارکردنە بۆ جێبەجێکردنی پڕۆژەکان.''

 

 

بڕیار بوو 17ـی کانوونی یەکەم دامەزراندنی 7300 کەس لە کەرکووک رابگەیێنرێت؛ پارێزگاری کەرکووک لەوبارەوە گوتی، ''بێگومان حکومەتی کەرکووک بڕیاری لەسەر دەدات و هیچ دەسەڵاتێک لەسەرووی نییە کە بڵێت دامەزراندنەکە دەکرێت یان نا.''

 

بڕیارە پێشکێشکردنی داواکاریی دامەزراندنەکە بە ئەلیکترۆنی بێت، رێبوار تەها ئاماژەی دا، ''کێشەیەکمان لە ماڵپەڕەکەدا هەبوو کە ئێستا کاری لەسەر دەکرێت و  لەگەڵ چارەسەربوونی، کاتی پێشکێشکردنی مامەڵەکان رادەگەیێنرێت.''

 

لە کۆی 150 هەزار پشکی دامەزراندن کە لە بودجەی 2024ـی عێراق بڕیاری لەسەر دراوە، 7 هەزار و 304 کەس بەشێوەی گرێبەست لە کەرکووک دادەمەزرێن.

 

 

پارێزگاری کەرکووک ئەوەشی خستەڕوو، هەر لایەنێک کە تاوەکو ئێستا سەردانی حکومەتی خۆجێیی پارێزگاکەی کردبێت، ''دڵخۆشن بەوەی کە ئیدارەکەمان تایبەتە بە هەموو پێکهاتەکانەوە، ئێمە توانیومانە یەکگرتووییەک لە نێوان حکومەت و شەقامی کەرکووک پێکبهێنینەوە کە ماوەیەکی زۆر بوو خەڵک لێی دابڕابوو. کار بۆ ئەوە دەکەین ئەم یەکگرتووییە بەهێزتریش بکەین''.

 

گوتیشی، ''توانیومانە بە هاوکاریی وەزارەتی پلاندانانی عێراق پرۆژەکان بگەیێنینە زۆرێک لە گەڕەکەکانی کەرکووک کە پێشووتر پەراوێز خرابوون، بەڵام ئێستا بەباشی بۆیان جێبەجێ دەکرێن، بەبێ جیاوازی.''

 

 

دوای رووداوەکانی سووریا و رووخانی رژێمی بەشار ئەسەد لە 8ـی کانوونی یەکەم، باس لەوە دەکرێت داعش هەوڵی خۆڕێکخستنەوە دەدات. رێبوار تەها جەختی لەوە کردەوە، ''هیچ مەترسییەک لەئارادا نییە کە داعش لە کەرکووک سەرهەڵبداتەوە.''

 

ئاماژەی بەوەش کرد، ''دۆخی ئەمنیی شارەکەمان لەوپەڕی باشیدایە، هێزە ئەمنییەکان لە کەرکووک، بەوپەڕی باشییەوە ئەرکەکانی خۆیان رایی دەکەن.''

 

سەردانەکەی رێبوار تەها بۆ بەغدا لەکاتێکدایە دادگەى کارگێڕيى عێراق سێ جار سکاڵاى عەرەب و تورکمانی کەرکووکی بۆ بڕیاردان دواخستووە، کە لە دژى پێکهێنانى حکومەتى خۆجێیی پارێزگاکە تۆمار کراون و بڕیارە سبەی دانیشتنی چوارەمی دۆسیەکە بەڕێوەبچێت.

 

هۆرڤان رەفعەت پەیامنێری تۆڕی میدیایی رووداو لە بەغدا دەڵێت، سبەی ئەگەری زۆرە بڕیار لەسەر دۆسیەکە بدرێت، بۆیە ئەمڕۆ پارێزگاری کەرکووک لەگەڵ شاندێک هاتوونەتە بەغدا بۆ کۆبوونەوە لەگەڵ ژمارەیەک لایەنی سیاسی، بۆ ئەوەی بتوانن شتێک بکەن، بڕیارەکەی دادگە کاریگەری لەسەر حکومەتی ئێستای کەرکووک نەبێت.

 

رێبوار تەها جەختی لەوە کردەوە، ئێمە رێز لە بڕیاری دادگە دەگرین و بڕوای تەواومان پێی هەیە، هەر بڕیارێک دەربکات پێیەوە پابەند دەبین. ئیدارەی ئێستای کەرکووک تەواو متمانەی بە بڕیاری دادگەکە هەیە و بڕیاری دانیشتنەکە هەرچی بێت، بەو پەڕی خۆشحاڵییەوە پێشوازی لێدەکەین.''

 

رۆژی 10ـی ئاب، ئەنجوومەنى پارێزگاى کەرکووک بە ئامادەبوونى 9 ئەندام لە هۆتێل رەشید لە بەغدا کۆبووەوە و حکومەتى خۆجێیی هەڵبژارد. پۆستى پارێزگار درا بە کورد لە پشکى یەکێتى و پۆستى سەرۆکى ئەنجوومەنى پارێزگاش درا بە عەرەب. ئەو هەنگاوە ناڕەزایی بەرەى تورکمانى، هاوپەیمانیی عەرەبی و فراکسیۆنى پارتى لێکەوتەوە، کە لەو کاتەوە بایکۆتى کۆبوونەوەکانى ئەنجوومەنیان کردووە.