رووداو دیجیتاڵ
لە دوو هەفتەى مەراسیمەکانى یادى چلەى ئیمام حوسێن لە چوار ناوچەى عێراق، زیاتر لە 268 ملیۆن پەیوەندیى تەلەفۆنى لە ناوخۆ و زیاتر 10 ملیۆن پەیوەندى تەلەفۆنى لە عێراقەوە لەگەڵ دەرەوە کراوە. قەبارەى گواستنەوەى زانیارییەکان لە رێگەى هێڵەکانى تەلەفۆنەوە گەیشتووەتە زیاتر لە 13 هەزار تێرابایت.
وردەکاریى ئەو ئامارانە لەلایەن دەستەى راگەیاندن و پەیوەندییەکانى عێراق بڵاوکراوەتەوە.
لە ئامارەکەدا هاتووە، لە ماوەى 13 رۆژ لە مەراسیمەکانى چلەى ئیمام حوسێندا لە کەربەلا، نەجەف، ناوچەى کازمیەى بەغدا و قەزاى سامەراى پارێزگاى سەلاحەدین، 268 ملیۆن و 728 هەزار و 434 پەیوەندى تەلەفۆنى ناوخۆیی کراوە، هەروەها 10 ملیۆن و 588 هەزار و 752 پەیوەندى تەلەفۆنى لەناو عێراقەوە لەگەڵ دەرەوە کراوە.
25ى ئاب یادى چلەى ئیمام حوسێن، سێیەم ئیمامى شیعەکانە و زیارەتکاران لە ناوەوە و دەرەوەى عێراق سەردانى شارى کەربەلا دەکەن کە مەزارگەى ئەو ئیمامەى لێیە، هەندێک لە زیارەتکاران سەردانى سامەرا و کازمییە و مەزارى ئیمام عەلى-یش لە نەجەف دەکەن.
بە گوێرەى ئامارەکەى دەستەى راگەیاندن و پەیوەندییەکان، لەو 13 رۆژەدا 30 ملیۆن و 803 هەزار و 330 نامە لە رێگەى مۆبایلەوە لەگەڵ دەرەوە ئاڵوگۆڕکراوە، گواستنەوەى زانیارییش لەهەمان رێگەوە بە قەبارەى 13 هەزار و 440 تێرا بایت بووە.
بەگوێرەى نوێترین ئامار کە دەستەى دەروازە سنوورییەکانى عێراق کە 23ى ئاب بڵاویکردووەتەوە، ژمارەى زیارەتکارانى بیانى کە سەردانى عێراقیان کردووە، گەیشتووەتە سێ ملیۆن و 133 هەزار و 432 کەس.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ