بۆ دابەشکردنی لیوا هاوبەشەکان پێشمەرگە و بەرگریی عێراق کۆدەبنەوە

 

عەمید روکن عادل جەبار زەنگەنە، نوێنەری وەزارەتی پێشمەرگە لە فەرماندەیی ئۆپەراسیۆنە هاوبەشەکانی عێراق بە تۆڕی میدیایی رووداوی راگەیاند، مەبەست لە کۆبوونەوەکە یەکلاییکردنەوە و دابەشکردنی ئەو هێزانەیە کە لە چوارچێوەی دوو لیوای هاوبەشدا لەنێوان پێشمەرگە و بەرگریی عێراق یەکخراونەتەوە.

 

بە گوتەی ئەو نوێنەرەی وەزارەتی پێشمەرگە: "ئەمڕۆ بڕیاری کۆتایی بۆ دابەشکردنی ئەو هێزانە و دیاریکردنی ئەرکەکانیان دەدرێت، چونکە ئەو هێزانە پڕچەککردنیان تەواو بووە، بودجەیان بۆ تەرخانکراوە و راهێنانیشیان کردووە، ئەوەی ماوەتەوە تەنیا بڵاوکردنەوەیانە."

 

کۆبوونەوەی ئەو لایەنە سەربازییانەی هەرێمی کوردستان و عێراق دوای هێرشەکانی مانگی رابردوو و ئەم مانگەی چەکدارانی داعش لە چەند ناوچەیەکی پارێزگاکانی سەڵاحەدین و دیالە و بەغدا دێت، کە زیاتر لە چوار کوژراو و 15 برینداری لە سوپای عێراق لێکەوتەوە.

 

رۆژی دووشەممە، 27-11-2023، وەزارەتی بەرگریی عێراق لە راگەیێندراوێکدا داوای لە سەرباز و پێشمەرگەکانی لیوای 20ـی هاوبەشی عێراق کرد، لە رۆژی شەممەوە، 2-12-2023، پەیوەندیی بە سەنتەرەکانی راهێنان لە پارێزگاکانی کەرکووک، دیالە و نەینەوا بکەن بۆ ئەوەی دەستبەکارببن و دواتر دەست بە مەشق و راهێنان و پڕچەککردن و دواتر بڵاوکردنەوەیان بکرێت.

 

مانگی ئابی ساڵی 2021 وەزارەتی پێشمەرگە و سوپای عێراق گەیشتنە رێککەوتن لەبارەی پێکهێنانی دوو لیوای هاوبەشی پێشمەرگە و سوپای عێراق، بۆئەوەی لەو ناوچانە بڵاوبکرێنەوە کە بۆشایی ئەمنین و داعش سوودیان لێوەردەگرێت، کە نزیکەی 560 کیلۆمەتر دەبێت.

 

هێزە هاوبەشەکە لە لیوای 20ـی پێشمەرگە و لیوای 66ـی سوپای عێراق پێکدێن. سەرپەرشتیاری یەکێک لە لیواکان کورد دەبێت و جێگرەکەی عەرەب دەبێت، ئەوی دیکەشيان فەرماندەکەی عەرەب بێت و جێگرەکەی لە نەتەوەی کورد دەبێت.

 

لیوای 20ـی هاوبەش زیاتر لە 3,700 پێشمەرگە دەبن و مووچە و پڕچەککردنیان لەسەر وەزارەتی بەرگریی عێراقە.