رووداو دیجیتاڵ
یەکەم کاروانی بریندارانی فەلەستینی لە رێگەی فڕۆکەیەکی سەربازی گەیشتە عێراق.
لە چوارچێوەی هەڵمەتی فریاکەوتنی غەززە، کە حکومەتی عێراق رایگەیاندووە، بە بڕیاری محەممەد شیاع سوودانی، سەرۆکوەزیران و ساڵح حەسناوی وەزیری تەندروستیی عێراق، ئێوارەی چوارشەممە (22-5-2024) یەکەم کاروانی بریندارانی فەلەستینی لە رێگەی میسرەوە بە فڕۆکەی سەربازی گەیشتە عێراق.
بریندارەکان 27 کەسن، 42 کەس یاوەریانن و لە نەخۆشخانەی خانەی پەرستاریی تایبەت لە شاری پزیشکی یەکەم لە بەغدا، چارەسەر وەردەگرن.
دکتۆر هانی موسا عقابی، بریکاری وەزارەتی تەندروستیی عێراق کە بە نوێنەری وەزیری تەندروستی لە پێشوازیی بریندارەکاندا بوو، گوتی "بریندارەکان ژن، منداڵ و بەتەمەنن، وەزارەتی تەندروستی هەموو پێویستی و رێکارێکیان بۆ دەگرێتەبەر."
هەر لەکاتی پێشوازی لە بریندارەکان لە فڕۆکەخانە، دکتۆر سەیف بەدر، گوتەبێژی تەندروستیی عێراق گوتی "فڕۆیەکی سەربازی عێراقی گەیشت، کە 27 بریندار و نەخۆشی کەسوکارمانی لە غەززە هەڵگرتبوو."
گوتەبێژی تەندروستیی عێراق باسی ئەوە دەکات حکومەتی عێراق و وەزارەتی تەندروستی بڕیاریانداوە هەموو چاودێرییەکی تەندروستی پێویست پێشکێشی بریندارەکان بکرێت ''جا چاودێرییەکە چارەسەر، یاخود شیاندنەوەیان بێ لە نێو دامەزراوەکانی وەزارەتی تەندروستی دا".
جەنگی غەززە زیاتر لە حەوت مانگە بەردەوامە و بەگوێرەی بەرپرسانی تەندروستیی غەززە، زیاتر لە 35 هەزار و 500 فەلەستنی کوژراون. بەگوێرەی حکومەتی ئیسرائیلیش، لە هێرشەکەی 7ـی ئۆکتۆبەری حەماسدا بۆ سەر ئیسرائیل، هەزار و 160 کەس کوژران و لانیکەم 240ی دیکەش بەبارمتە گیراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ