رووداو دیجیتاڵ
لیژنەی کاروباری نایجیرییەکان لە دەرەوەی ئەو وڵاتە رایگەیاند، زیاتر لە پێنج هەزار ژنی نایجیری لە عێراق گیریان خواردووە. لیژنەی ژنان و خێزان و منداڵان لە پەرلەمانی عێراقیش دەڵێت، بەدواداچوون بۆ ئەو پرسە دەکەن.
ئەبیکی دابێری-ئێریوا، سەرۆکی لیژنەی کاروباری نایجیرییەکان لە دەرەوە (NiDCOM)، لە لێدوانێکدا کە میدیاکانی نایجیریا بڵاویان کردووەتەوە، باسی لەوە کردووە، زیاتر لە پێنج هەزار ژنی نایجیری لە عێراق گیریان خواردووە، دوای ئەوەی بۆ کار چوونەتە ئەو وڵاتە.
بەگوتەی سەرۆکی لیژنەکە، زۆر لەو ژنانە رووبەڕووی دۆخی سەخت بوونەتەوە، لە نوێترین رووداودا ژنێکیان لە کاتی کارکردنیدا لە عێراق بە شێوەیەکی گوماناوی گیانی لەدەستداوە.
نەجم عەقابی، گوتەبێژی وەزارەتی کار و کاروباری کۆمەڵایەتیی عێراق، پێنجشەممە 23-01-2025، بە تۆڕی میدیایی رووداوی راگەیاند، رۆڵی وەزارەتی کار لەم بابەتەدا بریتییە لەوەی کە مۆڵەتی کار دەدات، دوای ئەوەی راپۆرتی تەندروستی دەگات، بۆ دڵنیابوون لەوەی کە ئەو کەسانە هیچ نەخۆشییەکیان نییە.
گوتەبێژی وەزارەتی کار و کاروباری کۆمەڵایەتیی گوتی، سەرەتا پەڕاوی ئەمنییان بۆ دەکرێتەوە، پاشان رەوانەی کۆمپانیاکان دەکرێن، ئینجا بۆ وەزارەت. ئەمە لە کاتێکدا ئەگەر ئەمانە بە شێوەیەکی یاسایی بێنە نێو عێراق.
نەجم عەقابی دەڵێت، ئەگەر لە ماڵان کار بکەن، دوای تەواوکردنی هەموو مەرج و رێنماییەکان، خاوەنی نووسینگەی مۆڵەتدار، یان سەرپەرشتیاری خێزان کە ئەو کەسە لە ماڵەکەی کار دەکات، بەرپرسیارێتی هەڵدەگرن.
بە گوتەی گوتەبێژی وەزارەتی کار و کاروباری کۆمەڵایەتیی عێراق، چەند لایەنێکی بەرپرس هەن لە هاتنە ناوەوەی ئەو کەسانە، وەک فەرمانگەی نیشتەجێبوون و هەندێک لایەنی ئەمنی دیکە.
نزیکەى یەک ملیۆن کرێکارى بیانى لە عێراق کار دەکەن؛ بە گوێرەى سەندیکاى کرێکارانى عێراق، نزیکەى 70%یان بێ مۆڵەت کار دەکەن.
سروە محەممەد، جێگری سەرۆکی لیژنەی ژنان و خێزان و منداڵان لە پەرلەمانی عێراق، ئەمڕۆ پێنجشەممە 23-01-2025، بە تۆڕی میدیایی رووداوی راگەیاند، بەشێک لەو ژن و کرێکارانە دەهێنرێنە دوبەی و وڵاتانی دیکەی کەنداو، دواتر بە شێوەیەکی نایاسایی دەهێنرێنە نێو عێراق. بۆیە زۆرجار زانیاریی دروست نییە لەبارەی ئەمانەوە کە لە ماڵ و شوێنەکان کار دەکەن.
جێگری سەرۆکی لیژنەی ژنان و خێزان و منداڵان لە پەرلەمانی عێراق گوتی، لیژنەکەیان بەدواداچوون بۆ ئەو کەیسە دەکات و هەفتەی داهاتوو لایەنە پەیوەندارەکان، لەوانەش وەزارەتی ناوخۆ، بانگهێشتی لیژنەکەیان دەکەن.
بەگوێرەى یاساى کارى عێراق، نابێت هیچ کرێکارێکى بیانى بەبێ مۆڵەتى وەزارەتى کار لە هیچ شوێنێک کار بکات، دەبێت خاوەن کارەکەى تێچووى تیکتى گەشتەکەى بۆ عێراق بگرێتە ئەستۆ، ئەگەر کرێکارە بیانییەکە گیانلەدەستبدات، پێویستە خاوەنکارەکەى تێچووى گواستنەوەى تەرمەکەى بۆ وڵاتەکەى بگرێتە ئەستۆ.
ئەبیکی دابێری-ئێریوا، ئاماژەی بەوە دەکات کار دەکەن بۆ گەڕاندنەوەی تەرمی ئەو ژنەی تازە گیانی لەدەستداوە و لە هۆکاری مردنەکەی دەکۆڵنەوە.
وێڕای هۆشداریدان لە مەترسییەکانی کۆچی نائارام، هاوکات داوا لە نایجیرییەکان دەکات، گرنگە بەدوای دەرفەتە ناوخۆییەکان بگەڕێن لەبری ئەوەی لە دەرەوە ژیانیان بخەنە مەترسییەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ