رووداو دیجیتاڵ
لە پەرلەمانی عێراق 110 واژۆ بۆ پەسندکردنی پرۆژەیاسای بە پارێزگاکردنی هەڵەبجە کۆدەکرێتەوە. نوێنەرێکی هەڵەبجە دەڵێت، پێش 16ـی ئاداری ئەم ساڵ پڕۆژەکە دەنگی لەسەر دەدرێت.
چرۆ حەمەشەریف، ئەندامی پەرلەمانی عێراق و نوێنەری پارێزگای هەڵەبجە، کە واژۆکانی کۆکردووەتەوە، رۆژی (پێنجشەممە، 23-01-2025) بە تۆڕی میدیایی رووداوی راگەیاند: "سەرجەم فراکسیۆنە جیاوازەکان واژۆیان لەسەر یاداشتەکە کردووە. ئەمڕۆ بە فەرمی پێشکێشی دەستەی سەرۆکایەتیی پەرلەمانی دەکەم، بۆ ئەوەی بخرێتە بەرنامەی کار و دەنگی لەسەر بدرێت."
پڕۆژەکە خوێندنەوەی یەکەم و دووەمی بۆ کراوە، تەنیا دەنگدانی ماوە.
بە گوتەی ئەو ئەندامەی پەرلەمانی عێراق، زۆربەی فراکسیۆنەکان هەڵوێستیان ئەرێنییە و پشتیوانی خۆیان دەربڕیوە. بۆیە گەشبینە پێش 16ی ئاداری ئەم ساڵ، ساڵیادی کیمیابارانکردنی هەڵەبجە، پڕۆژەکە دەنگی لەسەر بدرێت و هەڵەبجە بە فەرمی ببێتە پارێزگا.
بە پارێزگاکردنی هەڵەبجە 10 ساڵ زیاترە لە هەرێمی کوردستانەوە کاری بۆ دەکرێت، بەڵام هەر جارە و بە هۆکارێک لە بەغدا شکست بە هەوڵەکە دەهێندرێت.
رۆژی 24ـی کانوونی دووەمی 2013، نێچیرڤان بارزانی، سەرۆکوەزیرانی ئەو کاتی هەرێمی کوردستان، نێوەڕۆکی پرۆژەیاسای بەپارێزگابوونی هەڵەبجەی بە نووسراوی ژمارە 12034 ئاراستەی نووری مالیکی، سەرۆکوەزیرانی ئەو کاتی عێراق کرد، بەڵام ئەوکاتیش ناکۆکیی نێوان شیعەکان و سوننەکان، بووە هۆکار بۆ ئەوەی هەڵەبجە نەبێتە پارێزگایەکی نوێ.
بەپێی خەمڵاندنی دەستەی ئاماری هەرێمی کوردستان، ژمارەی دانیشتووانی هەڵەبجە ئەم ساڵ دەگاتە 125 هەزار کەس.
پارێزگاکە لە قەزایەک و چوار ناحیە پێکهاتووە؛ قەزای ناوەندیی هەڵەبجە و ناحیەکانی خورماڵ، بیارە، بەمۆ و سیروان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ