پاسپۆرتى عێراق دوو بڕیارى نوێى دەرکرد

 

بڕیارەکە ئەمڕۆ یەکشەممە، 22ى کانوونى یەکەمى 2024، دەرکراوە، واژۆى نەشئەت خەفاجى، بەڕێوەبەرى گشتیى بەڕێوەبەرایەتى بارى شارستانى و پاسپۆرت و نشینگەى عێراقى لەسەرە. ئاماژەى بەوە داوە کە رەزامەندى عەبدولئەمیر شەممەرى، وەزیرى ناوخۆ وەرگیراوە بۆ ئەوەى پاسپۆرت لە هەر بەشێکى سەر بەو بەڕێوەبەرایەتییە بێت لەنێو عێراق، بدرێتە هاووڵاتیان بەبێ بەستنەوە و پابەندکردنى بە شوێنى نیشتەجێبوونی.

 

سالار عەبدوڵڵا، بەڕێوەبەرى پاسپۆرتى سلێمانى دەرکردنى ئەو بڕیارەى پشتراستکردەوە و بە تۆڕى میدیایی رووداوى راگەیاند: "پێشتر دەبوو هاووڵاتیان بۆ دەرهێنانى پاسپۆرت لە هەمان ئەو شارە مامەڵەیان بکردایە کە تێیدا دەژیان و کارتى زانیارییان ئەو شارە بێت، بەڵام دواى ئەو بڕیارە هاووڵاتییان دەتوانن لە پاسپۆرتى هەر شارێک بێت مامەڵەکانیان بکەن، چونکە سیستمەکە ئەلیکترۆنییە و گوشار لەسەریان دروست نابێت."

 

لەنێو عێراق 50 ناوەندى ئەلیکترۆنى دەرهێنانى پاسپۆرت و لە دەرەوەى وڵاتیش 20 ناوەندى دیکە هەن کە بە شێوەیەکى ئەلیکترۆنى مامەڵەى دەرهێنانى پاسپۆرت دەکەن.

 

یەکێک لە بڕیارەکانى دیکەى بەڕێوەبەرایەتیی بارى شارستانى و پاسپۆرت و نشینگەى عێراق ئەوەیە بۆ  بەدەستهێنانى پاسپۆرتى ئەلیکترۆنى تەنیا پشت بە کارتى نیشتمانى دەبەسترێت.