دابەشکردنی مووچەی مانگی تەممووز لە عێراق دەستیپێکرد

 

رۆژی دووشەممە 22ـی تەمموزی 2024 وەزارەتی دارایی عێراق لە راگەیێندراوێکدا بڵاویکردەوە، "فەرمانگەی ژمێریاری، رێکارەکانی پارەدارکردنی مووچەی فەرمانبەرانی دەوڵەت و کارمەندانی هێزە ئەمنییەکانی بۆ ئەم مانگە[تەمموز] دەستپێکرد". 

 

وەزارەتەکە داوا لە فەرمانگەکانی ژمێریاریی وەزارەت، پارێزگاکان و دەستەکان دەکات سەردانی فەرمانگەی ژمێریاری بکەن بۆ تەواوکردنی پێداویستییەکانی پارەدارکردنی مووچەی فەرمانبەران و کارمەندەکانیان، بە رەچاوکردنی پابەندبوونیان بە خشتەی پارەدارکردنی مانگانەیان.

 

لە عێراق زیاتر لە 10 ملیۆن مووچەخۆر هەن کە زیاتر لە چوار ملیۆن و 70 هەزاریان فەرمانبەرن و دوو ملیۆن و 700 هەزاریان خانەنشینن.

 

وەزارەتی دارایی و ئابووریی هەرێمی کوردستان دوێنێ لیستی مووچەی رادەستی وەزارەتی دارایی عێراق کرد.

 

رۆژی یەکشەممە، 21ـی تەمموزی 2024، وەزارەتی دارایی هەرێمی کوردستان لە راگەیێندراوێکدا گوتی،  "ئەمڕۆ لیستی مووچەی مانگی تەممووزی سەرجەم فەرمانبەران و مووچەخۆران و دەزگە ئەمنی و سەربازییەکان لەلایەن تیمی هونەری وەزارەتی دارایی و ئابووریی هەرێمی کوردستانەوە رادەستی بەڕێوبەرایەتیی گشتیی ژمێریاری لە وەزارەتی دارایی حکومەتی فیدراڵ کرا."