فڕۆکەوانیی مەدەنیی عێراق کارمەند دادەمەزرێنێت و هەرێمی کوردستانیش دەگرێتەوە

 

دەسەڵاتی فڕۆکەوانیی مەدەنی عێراق پێویستی بە شارەزایانی ئەم بوارانە هەیە بۆ دامەزراندن:

 

- ئۆپەراسیۆنی فڕۆکەوانی

- مۆڵەتی کارمەندانی فڕۆکەوانی

- دەسەڵاتی فڕۆکەکان

- فڕۆکەوانی 

- پزیشکی فڕۆکەوانی 

 

جیهاد دیوان، بەڕێوەبەری راگەیاندن و پەیوەندییەکان لە دەسەڵاتی فڕۆکەوانیی مەدەنی عێراق، ئەمڕۆ (پێنجشەممە، 21-11-2024) بە تۆڕی میدیایی رووداوی راگەیاند، بەمەبەستی بەرزکردنەوەی ئاستی فڕۆکەوانی و جێبەجێکردنی پێوەرە نێودەوڵەتییەکان، دەسەڵاتی فڕۆکەوانیی مەدەنی پێشکێشکردنی داواکاری بۆ دامەزراندن راگەیاندووە.

 

بەگوتەی بەڕێوەبەرەکە، پسپۆرانی نێودەوڵەتی و ناوخۆیی، بە هەرێمی کوردستانیشەوە دەتوانن داواکاری پێشکێش بکەن. هەرکەسێک ئەزموون و کارامەیی هەیە، پێویستە لێهاتوویی خۆی و بڕوانامەی ئەزموون و راهێنانەکانی پێشکێش بکات. 

 

دەرگای پێشکێشکردن لە دوێنێوە کراوەتەوە و بۆ ماوەی 10 رۆژ بەردەوام دەبێت. دامەزراندنەکەش بە گرێبەستە.

 

جیهاد دیوان، دەڵێت، مووچەکان بەگوێرەی پسپۆری و کارامەیی ئەو کەسانە دەبن کە وەردەگیرێن، ئەوەش دوای ئەوەی چاوپێکەوتنیان لەگەڵ دا دەکرێت.