رووداو دیجیتاڵ
دەستەی باڵای حەج و عومرەی عێراق و بانکی ناوەندیی عێراق رێککەوتن، بۆ ئەوەی هەردوو بانکی رەشید و رافیدەین دۆلار بە نرخی فەرمی بدەنە زیارەتکارانی حەج.
18-05-2024 یەکەم کاروانی زیارەتکارانی عێراق، بۆ بەجێهێنانی فەریزەی حەج گەیشتنە سعودیە.
ئێوارەی رۆژی دووشەممە، 20-05-2024، دەستەی باڵای حەج و عومرەی عێراق رایگەیاند، بە بڕیاری محەممەد شیاع سوودانی، سەرۆکوەزیرانی عێراق بۆ ئەوەی ئاسانکاری بکرێ دۆلار بدرێتە زیارەتکاران، هەروەها سووربوونی بانکی ناوەندی لەسەر خزمەتکردنی زیارەتکارانی حەج، رێککەوتن کرا لقەکانی بانکی رافیدەین و رەشید دۆلار بدەنە زیارەتکاران.
رەشید و رافیدەین دوو بانکی حکومین. دەستەی باڵای حەج و عومرەی عێراق دەڵێت، لە بەغدا 30 لقی بانکی رەشید و رافیدین و 8 لقیش لە پارێزگاکان، بەگوێرەی خشتەی گەشتی زیارەتکاران دۆلاریان دەدەنێ، هەروەها لەو پارێزگایانەشی نەتوانراوە لقی ئەو بانکانە بکرێنەوە، کۆمپانیاکانی ئاڵوگۆڕی دراو لەو پارێزگایانە دۆلا دەدەنە زیارەتکارانی حەج.
بەگوتەی دەستەی باڵای حەج و عومرەی عێراق، بانکی "الناسك الإسلامي" تاکە بانکە لە رۆژانی رابردوودا دەستپێشخەریی کردووە، رۆژانە دۆلار بداتە زیارەتکارانی حەج.
لە عێراق بە فەرمی 16 هەزار 145 کەس لە رێگەی فڕۆکەخانەکانی عێراق و هەرێمی کوردستان گەشتی حەج دەکەن. هەروەها 19هەزار و 145 کەسی دیکە، بە رێگەی وشکانی لە رێگەی دەروازە عەرعەر دەچنە حەج.
لقەکانی بانکی رافیدەین لە بەغدا: وەزیرییە، مەنسوور، رافعی، ئەمینداری گشتی ئەنجوومەنی وەزیران، گەڕەکی ئەفسەران، قودس، مەشتەل، مەعریفە، شەقامی فەڵەستین و گەڕەکی عامل. هەروەها لقەکانی بەنکی رەشید: یەرمووک، کەرخ، جەوادەین، مەحمودییە، ئەبوغرێب، شۆرجە، ئەرخیتە، ئیعتیمادی بازرگانی و سەورەی عشرین دۆلار دەدەنە حاجیان.
بەگوێرەی بەڕێوەبەرایەتیی حەج و عومرەی هەرێمی کوردستان، 27ی ئایار یەکەم گەشتی ئاسمانی بۆ گواستنەوەی زیارەتکارانی حەج دەستپێدەکات و 30ی هەمان مانگ دوایین گەشت دەکرێت. یەکەم گەشتی وشکانیش 29ی ئایار دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ