رووداو دیجیتاڵ
سەرۆکوەزیرانی عێراق بەبۆنەوەی جەژنی نەورۆزەوە پەیامێکی پیرۆزبایی بە زمانەکانی کوردی، عەرەبی و ئینگلیزی بڵاوکردەوە و رایگەیاند، "جگە لە پێکەوەکارکردن و بەرزکردنەوەی بەهاکانی هاوبەشی و یەک چارەنووسی، هیچ جێگرەوەیەک نییە."
محەممەد شیاع سوودانی پیرۆزبایی جەژنی نەورۆزی لە گەلی کورد لە هەرێمی کوردستان کرد و رایگەیاند: "بەبۆنەوەی هاتنی جەژنەکانی نەورۆز و ئەو ئومێد و دڵخۆشی و ئاواتە بە بەیانییەکی گەشاوەی تێدایە، جوانترین ئومێدەکان و راستگۆترین پیرۆزبایی پێشکێش بە رۆڵەکانی گەلی ئازیزی کورد لە هەرێمی کوردستانی عێراق و سەرجەم گەلی عێراق دەکەم."
سەرۆکوەزیرانی عێراق لە پەیامەکەیدا ئاماژە بۆ ئەوە دەکات کە جارێکی دیکە نەورۆز دێتەوە و رۆڵەکانی گەل بەردەوامن لە کارکردن و بونیادنان و رەخساندنی هەنگاوەکان "لەپێناو بەدیهێنانی ئاوات و ئامانجە هاوبەشەکانی عێراقییەکان لە رۆشنایی کارنامەی حکومەت کە گوزارشت لە پێداویستیی و ئارەزووەکانیان دەکات."
سەرۆکوەزیرانی عێراق لە درێژەی پەیامەکەیەدا، باسی فرەیی رۆڵەکانی گەلانی عێراق دەکات کە بە گوتەی ئەو "هێزە" بۆ پێشکێشکردنی خزمەت و پاراستنی مافەکان.
لە کۆتایی پەیامەکەیدا، محەممەد شیاع سوودانی، سەرۆکوەزیرانی عێراق دەڵێت "دەمانەوێت ئەوە بهێننەوە یاد کە جگە لە پێکەوە کارکردن و بەرزکردنەوەی بەهاکانی هاوبەشی و یەک چارەنووسی و ئەو داهاتووەی پێکەوە لە سەرجەم ناوچەکانی عێراق دەیکێشین، هیچ جێگرەوەیەکی دیکە نییە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ