عێراق
ئەو نەخشەی عێراق کە لە ماڵپەڕی وەزارەتی دەرەوەی بەریتانیا هەیە و سەلامەتیی ناوچەکانی عێراقی بە رەنگی جیاواز کردووە
prev
next
روووداو دیجیتاڵ
وەزارەتی دەرەوەی عێراق پێشوازی لە بڕیاری بەریتانیا بۆ کەمکردنەوەی ئاستی ئەمنی لە وڵاتەکەی دەکات. وەزیری دەرەوەش نامە بۆ ئەمریکا و وڵاتانی ئەورووپا دەنێرێت.
رۆژی 13ی ئەم مانگە محەممەد شیاع سوودانی، سەرۆکوەزیرانی عێراق بە سەردانێکی فەرمی لەسەر داوای کیەر ستامەر، سەرۆکوەزیرانی بەریتانیا چووە لەندەن.
هاوکات لەگەڵ سەردانەکەدا وەزارەتی دەرەوەی بەریتانیا لە پێگەی فەرمیی خۆی ئەو نەخشەیەی عێراقی ئەپدەیت کردەوە کە تێیدا هۆشداریی بە هاووڵاتییانی دابوو سەردانی بەشێکی عێراق نەکەن.
بەگوێرەی راگەیێندراوی رۆژی سێشەممە 21-01-2025ی وەزارەتی دەرەوەی عێراق، کەمکردنەوەی ئاستی ئەمنی دەرفەت بۆ کۆمپانیا بەریتانییەکان بۆ وەبەرهێنان لە عێراق دەڕەخسێنێت.
وەزارەتی دەرەوەی عێراق داوا لە وڵاتانی دیکەی رۆژئاوا و یەکێتی ئەورووپا دەکات پێداچوونەوە بۆ پۆلێنە ئەمنییەکانیان بۆ عێراق بکەن.
فوئاد حسێن، وەزیری دەرەوەی عێراق بەمنزیکانە نامە ئاراستەی ئەمریکا، کەنەدا، ئەڵمانیا، فەرەنسا، بەلجیکا، ئیتاڵیا، نەمسا و هۆڵەندا دەکات بۆ پێداچوونەوە بە پۆلێنە ئەمنییەکانیان، بە جۆرێک هاوڕێک بێت لەگەڵ پێشهاتە ئەرێنییەکان و باشتربوونی دۆخی ئەمنی عێراق.
پێش سەردانەکەی سوودانی، وەزارەتی دەرەوەی بەریتانیا جگە لە پارێزگاکانی هەرێمی کوردستان، سەرجەم پارێزگاکانی عێراقی لەسەر نەخشە بە سوور دیاریکردبوو، داوای لە هاووڵاتییانی کردبوو بە هیچ شێوەیەک سەردانی ئەو پارێزگایانە نەکەن.
هەرچی لەبارەی پارێزگاکانی هەرێمی کوردستانە، وەزارەتی دەرەوەی بەریتانیا پارێزگاکانی بە رەنگی زەرد دەستنیشان کردبوو و داوای لە هاووڵاتییانی کردبوو تەنیا بۆ کاری پێویست سەردانی بکەن.
13ی مانگ نەخشەکە گۆڕانکاری بەسەردا هات و بەشێک لە پارێزگاکانی عێراق لەسەر نەخشەکە زەرد کران، واتە هاووڵاتییان دەتوانن بۆ کاری پێویست سەردانی ئەو ناوچانەش بکەن.
ئەو ناوچانەی پێشتر لە لیستی سووردا بوون و ئێستا لەلایەن وەزارەتی دەرەوەی بەریتانیاوە زەرد کراون بریتین لە بەشێکی پارێزگای ئەنبار، بەشێکی پارێزگای بەغدا، پارێزگای کەربەلا، بەشێکی پارێزگای نەجەف، پارێزگای بابل، پارێزگای دیوانییە، پارێزگای زیقار، بەشێکی پارێزگای دیالە، بەشێکی پارێزگای واست، بەشێکی پارێزگای میسان و بەشێکی پارێزگای موسەننا.
سەرۆکوەزیرانی عێراق لە سەردانەکەی بۆ بەریتانیا لەگەڵ سەرۆکوەزیرانی ئەو وڵاتە و چارڵسی سێیەم، پاشای ئەو وڵاتە کۆبوویەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ