رووداو- هەولێر
راوێژکاری ئاسایشی نیشتمانیی عێراق بە جێگری یاریدەدەری وەزیری بەرگریی ئەمریکای راگەیاند: "عێراقێکی یەکگرتووی بەهێز گەرەنتییە بۆ ناوچەکە و جیهان. بەهێزبوونی حکومەتی عێراقیش رێگە لە دەستوەردان لە کاروباری نێوخۆیی دەگرێت". قاسم ئەعرەجی لە کۆبوونەوەشی لەگەڵ یاریدەدەری سەرۆکی دەزگای هەواڵگریی سوپای پاسدارانی ئێران گوتی: "عێراق رەتیدەکاتەوە خاکەکەی لەلایەن ئۆپۆزیسیۆنی ئێران و تورکیاوە بۆ هێرشکردنە سەر ئەو دوو وڵاتە بەکاربهێندرێت".
رۆژی سێشەممە 20-9-2022، قاسم ئەعرەجی، راوێژکاری ئاسایشی نیشتمانیی عێراق لە بەغدا پێشوازیکرد لە سیلیست واڵاندر، یاریدەدەری وەزیری بەرگریی ئەمریکا و شاندی یاوەری کە تێیدا ئەلینا رۆمانۆسکی، باڵیوزی ئەمریکا لە عێراق ئامادە بوو.
بەپێی راگەیێندراوێکی نووسینگەی قاسم ئەعرەجی، لە دیدارەکەدا "پەیوەندیی هاوبەش و هاوکاریی نێوان عێراق و ئەمریکا باسکرا، لەگەڵ چۆنییەتیی بەهێزکردنی ئاسایش و سەقامگیریی ناوچەکە بەشێوەیەک خزمەتی ئاسایش و ئاشتی جیهان بکات."
یاریدەدەری وەزیری بەرگری ئەمریکا گوتی، عێراق و ئەمریکا لە شەڕی دژی داعشدا هاوبەشن و ستایشی رۆڵی عێراقی کرد لەبەرەنگاربوونەوەی تیرۆر و راوەدوونانی شانە نووستوەکانی رێکخراوە تیرۆریستییەکە و رایگەیاند، "ئێستا کاتی ئەوەیە توانا و لێهاتوویی هێزە عێراقییەکان لە بواری سەربازی پەرەیان پێبدرێت".
قاسم ئەعرەجیش گوتی: "عێراق بە رێزەوە لە هاوکاری و پشتیوانییەکانی هاوپەیمانیی نێودەوڵەتی دەڕوانێت. تاوەکو ئێستا داعش هەڕەشەیە بۆ سەر عێراق و ناوچەکە؛ بۆیە پێویستە کۆمەڵگەی نێودەوڵەتی دژی داعش کاریگەر بێت". هەروەها گوتیشی: "عێراق پێویستی بە پشتیوانی بواری هێزی ئاسمانی و بەرگریی ئاسمانییە؛ حکومەتی وڵات هەوڵدەدات سەرچاوەکانی چەکی جۆراوجۆر بکات".
راوێژکاری ئاسایشی نیشتمانیی عێراق گوتیشی، عێراقێکی یەکگرتووی بەهێز گەرەنتییە بۆ ناوچەکە و جیهان و بەهێزبوونی حکومەتی عێراقیش رێگە لە دەستوەردان لە کاروباری نێوخۆیی دەگرێت.
![کۆبوونەوەی راوێژکاری ئاسایشی نیشتمانیی عێراق لەگەڵ یاریدەدەری سەرۆکی دەزگای هەواڵگریی سوپای پاسدارانی ئێران](https://www.rudaw.net/Library/Images/Uploaded%20Images/2022/09/20/000000000.jpg)
هەر رۆژی سێشەممە قاسم ئەعرەجی لە نووسینگەی خۆی لە بەغدا پێشوازیکرد لە حەسەن محقق، یاریدەدەری سەرۆکی دەزگای هەواڵگریی سوپای پاسدارانی ئێران و شاندی یاوەری.
بە گوێرەی راگەیێندراوی نووسینگەی ئەعرەجی، حاجی حەسەن سوپاسگوزاریی وڵاتەکەی گەیاندە عێراق و گەل و دەزگا ئەمنییەکان، ئەوەش لەبەرامبەر ئەوەی پێشكێشی زیارەتکارانیان کردووە لە چلەی ئیمام حوسێن دا. هەر لە دیدارەکەدا گفتوگۆکرا لەبارەی هاوکاریی هەواڵگریی نێوان هەردوو وڵاتی دراوسێ و تووندوتۆڵکردنی سنوور و رێگریکردن لە قاچاخچییەتی.
قاسم ئەعرەجی گوتی: "عێراق رەتیدەکاتەوە خاکەکەی لەلایەن ئۆپۆزیسیۆنی ئێران و تورکیاوە بەکاربهێندرێت بۆ هێرشکردنە سەر ئێران و تورکیا. حکومەتی عێراقیش دەیەوێت ئەو دۆسیەیە کۆتایی بێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ