وەزارەتی پەروەردەی عێراق و پەرلەمان دزەکردنی پرسیارەکان رەتدەکەنەوە

 

 

تائێستا لە عێراق سێ تاقیکردنەوەی پۆلی شەشی ئامادەیی کراون؛  بۆ خوێندنی عەرەبی بابەتەکانی پەروەردەی ئیسلامی، زمانی عەرەبی و زمانی ئینگلیزی. بۆ خوێندنی کوردی، پەروەردەی ئیسلامی و عەرەبی، زمانی کوردی و زمانی ئینگلیزی تاقیکردنەوەیان تێدا کراوە؛ بەڵام بەهۆی جەژنی قوربانەوە تاقییکردنەوەکان راگیراون، بڕیارە 23ی مانگ دەستپێبکەنەوە.

 

نەجوا حەمید، ئەندامی لیژنەی پەروەردە لە پەرلەمانی عێراق، رۆژی پێنجشەممە 20-06-2024 بە تۆڕی میدیایی رووداوی گوت: "تاوەکو ئێستا هەر سێ تاقیکردنەوەکە بێ گرفت بەڕێوەچوون و هیچ کێشەیەک نەبووە".

 

لە تۆڕە کۆمەڵایەتییەکان باس لە دزەکردنی پرسیارەکان دەکرێت. ئەندامەکەی لیژنەی پەروەردە دەڵێت: "ئەو قسانە دوورن لە راستییەوە، تائێستا هیچ پرسیارێک دزەی نەکردووە، ئەو قسانەشی لەوبارەوە دەکرێن تەنیا پروپاگەندە و قسە و قسەڵۆکی سۆشیال میدیان".

 

نەجوا حەمید، گوتی: "ئەگەر پرسیاری هەر بابەتێکی تاقیکردنەوە دزەی پێبکرێت و پێشوەختە ئاشکرا بێت، رێکاری تووند دەگرینەبەر، تاقییکردنەوەی بابەتەکە دوادەخەین و ئەنجامەکەی هەڵدەوەشێنینەوە".

 

زیاتر لە 650 هەزار قوتابی لە تاقیکردنەوەکان بەشدارن.

 

هەر لەوبارەوە رۆژی 19-06-2024، کەریم سەید، گوتەبێژی وەزارەتی پەروەردەی عێراق لە راگەیێندراوێکدا رایگەیاند: "ئەوەی لە تۆڕە کۆمەڵایەتییەکان و کەناڵەکانی تەلەگرام بڵاودەبێتەوە لەبارەی کڕین و فرۆشتنی پرسیارەکان هەمووی دۆریە".

 

بە گوتەی گوتەبێژی وەزارەتی پەروەردە، "ئەمانە فێڵی هەندێک دەروون لاوازن، لەلایەن وەزارەتی پەروەردە و هێزە ئەمنییەکان دیاریکراون و چارەسەرکراون".

 

وەزارەتی پەروەردە داوای لە قوتابییان دەکات ئەو کردەوە "پیس و نەگریسانە" نەیانشڵەژنێ، با قوتابییان خوێندنی خۆیان بکەن.