'مقاوەمەی ئیسلامی لە عێراق': ئەمریکا کۆنتڕۆڵی بڕیاری ئەمنی و ئابووریی عێراقی کردووە

 

گرووپەکە دوای کۆبوونەوەیەکەیان راگەییێندراوێکیان بڵاوکردەوە، کە تێیدا هاتووە: "دەستەی هاوئاهەنگیی مقاوەمەی عێراق کۆبوونەوەیەکی نائاساییان بۆ تاوتوێکردنی رووداوەکانی ناوچەکە بە گشتی و عێراق بەتایبەتی کرد و جەختی لەسەر روونی لە هەڵوێستەکانی و شەفافیەت لە راگەیێندراوەکانی کردەوە بۆ ئەوەی گەلەکەمان ئاگاداری رووداوەکانی دەوروبەری بێت."

 

لەبارەی کشانەوەی هێزەکانی ئەمریکا لە عێڕاق، گرووپەکە دەڵێت: "تاوتوێی بابەتی ئەو مۆڵەتە کرا کە پێش چوار مانگ لەمەوبەر دامانە حکومەت بۆ دانانی وادەی کشانەوەی هێزەکانی ئەمریکا لە عێراق، جەختدەکەینەوە لەسەر پێویستیی بەردەوامی بۆ بەدەستهێنانی تەواوی سەروەریی وڵات، دوای خاوەخاویی دوژمن و عینادییەکەی، بەوەش هێشتا داگیرکەری خاکەکەمانە و کۆنتڕۆڵی بڕیاری ئەمنی و ئابووریی عێراقی بەدەستەوەیە، بەوپەڕی بێشەرمییەوە دەستوەردان لە کاروباری عێراق دەکات، وەکو ئەوەی نەزانێت دوای ئەو دەرفەتە چی چاوەڕوانی دەکات."

 

گرووپەکە  لە بەشێکی راگەیێندراوەکەیدا رژدبوونی خۆی لەسەر دەرکردنی هێزە بیانییەکان دووپاتکردووەتەوە و دەڵێت: "گەلی عێراق و مقاوەمە سەربەرزەکەی و سیاسەتمەدارە دڵسۆزەکانی و پیاوانی هۆز و پەرلەمانتارانی گەل دەتوانن و رژدن لەسەر داخستنی ئەو دۆسیەیە و کۆتایهاتنی بەبەکارهێنانی سەرجەم رێگە بەردەستەکان لەپێناو گێڕانەوەی ئاسایش و سەقامگیری و بەدیهێنانی سەروەرەیی تەواوەتی."

 

ئەم گرووپە کە لەدوای شەڕی غەززەوە دروستبووە، دروستبوو، لە 17ـی ئۆکتۆبەری 2023، لە عێراق و سووریا، هەرێمی کوردستان و رۆژئاوای کوردستان دەستیان بە هێرشەکانیان بۆ سەر هێزەکانی هاوپەیمانان بەتایبەتی ئەمریکا کرد. بەڵام دوای ئەوەی ئەمریکا چەند جارێک بەتووندی وەڵامی دانەوە، وازیان لە هێرشەکانیان لەو ناوچانە هێنا.

 

عێراق و ئەمریکا لە ساڵی 2008دا دوو رێککەوتنیان واژۆکرد؛ یەکەمیان ناسراوە بە "رێککەوتنی سۆفا" و دووەمیان "رێککەوتنی چوارچێوەی ستراتیژی". 

 

رێککەوتنی یەکەمیان لەگەڵ کشانەوەی هێزەکانی ئەمریکا لە کانوونی یەکەمی 2011 کۆتاییهات. دووەمیان رێککەوتنێکی فراوانە و تەنیا لایەنی ئەمنی ناگرێتەوە، بەڵکو بابەتی سیاسی، دیپلۆماسی، رۆشنبیری، خوێندن، ژینگە و زۆر بابەتی دیکەی لەخۆگرتووە و هیچ کاتێکیش بۆ کۆتاییهاتنی دیاری نەکراوە.