لە بەغدا باندێک دەستگیرکران کە ویستوویانە منداڵێک بفرۆشن

 

رۆژی شەممە 20-05-2023 وەزارەتی ناوخۆی عێراق رایگەیاند، ئاژانسی هەواڵگری ئۆپەراسیۆن و بەدواداچوونەکانیان بەردەوامە بۆ دەستگیرکردنی ئەو باندە تاوانکارییانەی بازرگانی بە مرۆڤ و ئەندامەکانی جەستەی مرۆڤەوە دەکەن. 

 

بەپێی وەزارەتی ناوخۆی عێراق، لە چوارچێوەی بەدواداچوونەکانیان ئەمڕۆ (شەممە، 20-5-2023) لە بەغدای پایتەختی عێراق باندێکیان دەستگیرکردووە کە ویستوویانە منداڵێکی تەمەن پێنج رۆژ بە 25 ملیۆن دینار بفرۆشن. 

 

وەزارەتی ناوخۆی عێراق دەڵێت، منداڵەكە رزگاركراوە و باندەکە کە لە چوار ژن و پیاوێک پێکدێن و لەكاتی مامەڵەی بازرگانیكردن بە منداڵەكەوە دەستگیركراون، لیکۆڵینەوە لەگەڵیاندا بەردەوامە.

 

تائێستا ئاشکرا نەکراوە، ئایا منداڵەکە هی ئەندامانی ئەو باندە بووە، یان رفاندوویانە و ویستوویانە بیفرۆشن .