یەحیا رەسوول بۆ رووداو: گرێبەستێکی نیو ملیار دۆلاری بۆ پڕچەککردنی هێزە ئاسمانییەکانی عێراق لە ئەمریکا واژۆکرا

 

لە کاتی بەشداریکردنی لە هەشتەمین دیداری سلێمانی، لیوا یەحیا رەسوول، گوتەبێژی فەرماندەی گشتیی هێزە چەکدارەکانی عێراق، بۆ تۆڕی میدیایی رووداو دوا و باسی لە پەیوەندییەکانی عێراق - ئەمریکا، گرێبەستی پڕچەککردن، هاوئاهەنگییەکانی فەرماندەیی ئۆپەراسیۆنە هاوبەشەکان لەگەڵ وەزارەتی پێشمەرگە کرد. 

 

لیوا یەحیا رەسوول، لەبارەی سەردانە پێنج رۆژییەکەی محەممەد شیاع سوودانی، سەرۆکوەزیرانی عێراق گوتی: "ئەم سەردانە خاڵی وەرچەرخانە لە پەیوەندییەکانمان لەگەڵ ویلایەتە یەکگرتووەکانی ئەمریکا کە لە رێککەوتنی چوارچێوەی ستراتیژیدا کراوە. پێکهاتەی شاندەکە زیاتر ئابووری بووە و هیچ شاندێکی سەربازیی لەخۆ نەگرتبوو."

 

بەڵام لە کاتی سەردانەکەی فەرماندەی گشتیی هێزە چەکدارەکان، بابەتی گرێبەستی پڕچەککردن کە پێشتر ئامادەکرابوو لەگەڵ لایەنی ئەمریکی بە گوژمەی نیو ملیار دۆلار واژۆیان لەسەر کرد، یەحیا رەسوول دەڵێ "ئەمەش پەیامێکی هاوئاهەنگییە لەنێوان عێراق و ویلایەتە یەکگرتووەکانی ئەمریکا لە بواری سەربازی. هەروەها پەیامێکی بەڕێز فەرماندەی گشتیی هێزە چەکدارەکانی عێراقیشە کە بایەخی زۆر بە بەرزکردنەوەی ئاست و تواناکانی سوپا و هێزە ئەمنییەکانی عێراق دەدات."

 

گوتەبێژی فەرماندەی گشتیی هێزە چەکدارەکانی عێراق، لەبارەی هاوئاهەنگییەکانی نێوان فەرماندەیی ئۆپەراسیۆنە هاوبەشەکان و وەزارەتی پێشمەرگە گوتی "پەیوەندییەکی زۆر بەهێزمان هەیە. سوپاسالاری پێشمەرگە بەردەوام بەشداری لە کۆبوونەوەکانی ئەنجوومەنی وەزاری بۆ کاروباری ئاسایشی نیشتمانی دەکات."

 

لیوا یەحیا: ئەم سەردانە خاڵی وەرچەرخانە لە پەیوەندییەکانمان لەگەڵ ویلایەتە یەکگرتووەکانی ئەمریکا، کە لە رێککەوتنی چوارچێوەی ستراتیژیدا کراوە. پێکهاتەی شاندەکە زیاتر ئابووریی بووە و هیچ شاندێکی سەربازیی لەخۆنەگرتبوو، بەڵام لە کاتی سەردانەکەی بەڕێز فەرماندەی گشتیی هێزە چەکدارەکان، بابەتی گرێبەستی پڕچەککردن کە پێشتر ئامادەکرابوو لەگەڵ لایەنی ئەمریکی بە گوژمەی نیو ملیار دۆلار واژۆیان لەسەرکرد. ئەمەش پەیامێکی هاوئاهەنگییە لەنێوان عێراق و ویلایەتە یەکگرتووەکانی ئەمریکا لە بواری سەربازیدا. هەروەها پەیامێکی بەڕێز فەرماندەی گشتیی هێزە چەکدارەکانی عێراقە کە بایەخی زۆر بە بەرزکردنەوەی ئاست و تواناکانی سوپا و هێزە ئەمنییەکانی عێراق دەدات. 

 

 

لیوا یەحیا: لە چوارچێوەی سیستەمی بەرگریی عێراقدا، پەیوەندییەکی زۆر بەهێزمان لەگەڵ پێشمەرگە هەیە. سوپاسالاری پێشمەرگە بەردەوام بەشداری لە کۆبوونەوەکانی ئەنجوومەنی وەزاری بۆ کاروباری ئاسایشی نیشتمانی دەکات. هاوئاهەنگییەکی باڵا لەنێوان فەرماندەیی ئۆپەراسیۆنە هاوبەشەکان و وەزارەتی پێشمەرگە هەیە. بەدڵنیاییەوە هەر شتێک لە بەرژەوەندیی هێزە چەکدارەکانمان بێت، فەرماندەیی ئۆپەراسیۆنە هاوبەشەکان، هاوئاهەنگی لەگەڵ فەرماندەیی وەزارەتی پێشمەرگە دەکات.