وەزارەتی دارایی عێراق: مووچە لە وادەی خۆیدا دابەش دەکەین

 

رۆژی پێنجشەممە، 19-09-2024، وەزارەتی دارایی عێراق روونکردنەوەیەکی بۆ رای گشتیی بڵاویکردەوە و دەڵێت، بەمدواییانە هەندێک کەسایەتیی باس لە لێدوانێک دەکەن کە گوایە بەناوی وەزیری دارایی بڵاوبووەتەوە، بەوەی وەزارەتەکە ناتوانێت لە مانگەکانی داهاتوودا مووچەی فەرمانبەران بدات، "ئەو قسانە دوورن لە راستییەوە و وەزیری دارایی ئەو لێدوانەی نەداوە."

 

وەزارەتی دارایی پابەندبوونی خۆی دووپاتدەکاتەوە، کە مووچەی فەرمانبەران، خانەنشینان، چاودێریی کۆمەڵایەتی و سەرجەم هێزە ئەمنییەکان بە حەشدی شەعبییەوە لە وادەی خۆی دەدات، بەگوێرەی یاسا و رێکخستنە کارپێکراوەکان. 

 

هەروەک وەزارەتەکە داوا لە رای گشتیی، میدیاکار و هەمووان دەکات، کە گرنگی بەم بابەتە دەدەن، بەدوای ئەو پڕوپاگەنادانە و هەواڵی ناڕاست نەکەون. بۆ دەستخستنی زانیاری راست و دروستیش، پشت بە سەرچاوەی فەرمی ببەستن.

 

لە عێراق نزیکەی 11 ملیۆن مووچەخۆر هەن. مانگانە لە دوای 18 مانگەوە رێکارەکانی دابەشکردنی مووچە دەستپێدەکات.

 

تائێستا فەرمانبەرانی هەرێمی کوردستان مووچەی مانگی ئاب-یان وەرنەگرتووە. لە عێراق ئامادەکاری بۆ دابەشکردنی مووچەی مانگی ئەیلوول دەکرێت.