وەزارەتی گواستنەوەی عێراق: 11 فڕۆکەی لەکارکەوتوومان چاککردنەوە

 

 

مەیسەم سافی، گوتەبێژی وەزارەتی گواستنەوەی عێراق، رۆژی دووشەممە 19-08-2024 بە تۆڕی میدیایی رووداوی راگەیاند، لە ساڵی رابردووە تاوەکو ئێستا 11 فڕۆکەی لەکارکەوتووی کۆمپانیای هێڵی ئاسمانی عێراقی چاککراونەتەوە، تاوەکو کۆتایی ئەم ساڵیش چواری دیکە چاک دەکرێنەوە و دەکەونە کار.

 

کۆمپانیای گشتیی هێڵی ئاسمانیی عێراقییە، کۆمپانیایەکی حکومییە و سەر بە وەزارەتی گواستنەوەی عێراقە، لە 1945 دامەزراوە. هێڵەکە گەشتی بۆ زیاتر لە 40 وڵات هەیە کە وڵاتانی رۆژهەڵاتی نێوەڕاست، ئاسیا، ئەفریقا و ئەورووپان. 

 

گوتەبێژی وەزارەتی گواستنەوەی عێراق دەڵێت، هێڵەکە بە کۆی گشتیی 39 فڕۆکەی هەیە، ئێستا 26 فڕۆکەی کۆمپانیاکە لە کاردان. بەنیازیشە ساڵی داهاتوو پێنج فڕۆکەی دیکە بکڕێت.

 

لە عێراق و هەرێمی کوردستان شەش فڕۆکەخانەى نێودەوڵەتی هەن، پێکهاتوون لە فڕۆکەخانەکانى: بەغدا، هەولێر، سلێمانى، کەرکووک، نەجەف و بەسرە. بڕیارە بۆ ساڵی داهاتووش سێ فڕۆکەخانەی دیکە بکرێنەوە، کە بریتین لە: موسڵ، کەربەلا و ناسریە.