رووداو دیجیتاڵ
نەخۆشیی تەبەق لەنێو ئاژەڵانی نێوەڕاست و باشووری عێراق بڵاوبووەتەوە. بەگوێرەی ئاماری سەرەتایی وەزارەتی کشتوکاڵ بەهۆیەوە 654 ئاژەڵ مردار بوون. بەڕێوەبەری سامانی ئاژەڵ و ڤێتەرنەریی هەرێمی کوردستان دەڵێت، ئەو نەخۆشییە لە هەرێمی کوردستان بڵاونەبووتەوە و نییە.
تەبەق نەخۆشییەکی ڤایرۆسییە، تووشی ئاژەڵە سمدارە دوولەتەکان دەبێت و ژێر سمی ئاژەڵەکە بریندار دەکات. بەپێی لێکۆڵینەوەکان، نەخۆشیی تەبەق خێراترین نەخۆشیی ڤایرۆسییە بۆ بڵاوبوونەوە لەنێو ئاژەڵاندا.
رابەر محەممەد، بەڕێوەبەری سامانی ئاژەڵ و ڤێتەرنەریی هەرێمی کوردستان، چوارشەممە (19-02-2025) بە تۆڕی میدیایی رووداوی راگەیاند، "ئەو نەخۆشییە لە هەرێمی کوردستان بڵاونەبووەتەوە و نییە. هیچ ئاژەڵێکیش لە ناوەڕاست و باشووری عێراق هاوردەی هەرێمی کوردستان ناکەین، بەپێچەوانەوە ئەوان پشت بە هەرێمی کوردستان دەبەستن."
لە هەرێمی کوردستان نزیکەی شەش ملیۆن ئاژەڵی گەورە و بچووک هەن.
بەڕێوەبەری سامانی ئاژەڵ و ڤێتەرنەریی هەرێمی کوردستان ئاماژەی بەوەکرد، لیژنەی تایبەتیان پێکهێناوە، لە رووی تەندروستی و زانستی و ڤێتەرنەرییەوە، هاوئاهەنگییان لەگەڵ هەموو پارێزگا و ئیدارە سەربەخۆکان کردووە، ژووری ئۆپەراسۆنیان بۆ هەر دۆخێکی نەخوازراو پێکهێناوە.
عەباس جەبر مالیکی، وەزیری کشتوکاڵی عێراق، ئەمڕۆ (چوارشەممە) لە کۆنگرەیەکی رۆژنامەوانییدا، کە رووداویش ئامادە بوو، رایگەیاند، "ئەوەی سامانی ئاژەڵ تووشی بووە شتێکی گەورەیە، ئەگەر یەک مانگا، یان گامێشێک لە هەر پارێزگایەک لەدەستبدەین، وەکو زیانێک بۆ سامانی ئاژەڵ دەبینین."
وەزیری کشتوکاڵی عێراق گوتی "لە وەزارەت، ملیاران دینارمان بۆ بەخێوکەرانی ئەو ئاژەڵانە خەرجکردووە، بۆ کڕینی ئالیک، ساڵانە 50٪ـی خەرجییەکەی بۆ دابین دەکەین، بڕە پارەیەکی زۆریش لە ڤاکسینەکان خەرج دەکەین کە بە خۆڕایی دابەشیان دەکەین، لەگەڵ دەرمان و چاودێریی ڤێتەرنەری، ئەمانە ئەرکن لەسەر وەزارەت بۆ پاراستنی سامانی ئاژەڵ."
عەباس جەبر مالیکی نەخۆشییەکەی بە ئاسایی و سرووشتی ناوبرد و گوتی، نەخۆشیی تەبەق لە ساڵانی سییەکانەوە سەریهەڵداوە، ساڵانە سەرهەڵدەداتەوە، ئاژەڵان تووشی دەبن لە هەموو وڵاتانی جیهانیشدا هەیە، بەڵام لە عێراق رەگ و ریشەی داکووتیوە.
رۆژی سێشەممە (18ـی شوباتی 2025) نووسینگەی سەرۆکوەزیرانی عێراق رایگەیاند، "محەممەد شیاع سوودانی بڕیاریداوە لیژنەیەکی لێکۆڵینەوە لەسەر دەنگۆی تووشبوونی گامێش و مانگاکان بە نەخۆشیی تەبەق پێکبهێندرێت، کە لیژنەکە بە ئەندامێتیی چەند پسپۆڕێکی زانستی ڤێتێرنەری و بەرهەمی ئاژەڵان دەبێت."
بەگوێرەی نووسینگەی سەرۆکوەزیران، "لیژنەکە دەستیان بە کارکردن و وردبوونەوە لە حاڵەتەکان کردووە، هەروەها دیاریکردنی هۆکارەکان و وەرگرتنی نموونە لە ئاژەڵە تووشبووەکان بە هاوکاریی پسپۆرانی نێوخۆیی و نێودەوڵەتی و بە هاوئاهەنگیی لەگەڵ وەزارەتی کشتوکاڵ، رێکخراوی خۆراک و کشتوکاڵی نێودەوڵەتی، ئەوەش بۆ پشکنین لە تاقیگە جیهانییەکان."
سوودانی داوای لە لیژنەکە کردووە؛ کۆی ئەو زیانانە بخەمڵێنن کە لە ئەنجامی نەخۆشییەکە کەوتوونەتەوە.
بەگوێرەی نووسینگەی سوودانی، "لیژنەکە دڵنیایی داوە لەوەی بەکارهێنانی گۆشت و بەرهەمەکانی ئەو ئاژەڵانە وا ناکات کە ئەو نەخۆشییە بۆ مرۆڤ بگوازرێتەوە."
بەگوێرەی دوایین ئاماری وەزارەتی کشتوکاڵی عێراق، زیاتر لە 16 ملیۆن و 400 هەزار مەڕ؛ ملیۆنێک و 300 هەزار بزن؛ ملیۆنێک و 800 هەزار مانگا؛ 462 هەزار گامێش و زیاتر لە 200 هەزار وشتر لە عێراق هەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ