رووداو دیجیتاڵ
وەزیری ناوخۆی عێراق گەیشتە سعودیە و لەگەڵ هاوتا سعودییەکەی پرۆتۆکۆڵی هاوکاریی بواری ئاسایش لەنێوان هەردوو وڵات واژۆ دەکەن.
عەبدولئەمیر شەمەری، وەزیری ناوخۆی عێراق رۆژی یەکشەممە 19-02-2023 بە سەردانێکی فەرمی گەیشتە سعودیە و لەلایەن عەبدولعەزیز سعود، هاوتا سعودییەکەی پێشوازی لێکرا.
بەپێی راگەیێندراوی وەزارەتی ناوخۆی عێراق، ئامانجی سەردانەکە واژۆکردنی پرۆتۆکۆڵی هاوکاریی ئاسایشی نێوان هەردوو وڵات و گفتوگۆکردنە لەبارەی تەواوکردنی ژمارەیەک پرۆژەی هاوبەش کە جێگەی بایەخی هاوبەشن لە بوارەکانی ئاسایش و رووبەڕووبوونەوەی مادەی هۆشبەر.
هەریەک لە فەرماندەی هێزی پاسەوانی سنوور، بەڕێوەبەری بەرەنگاربوونەوەی مادەی هۆشبەر، راوێژکاری راهێنان لە وەزارەتی ناوخۆ، بەڕێوەبەری باری شارستانی و پاسپۆرت و نیشتەجێبوون، بەڕێوەبەری فەرمانگەی پەیوەندییەکان و راگەیاندن و ژمارەیەکی دیکە لە ئەفسەرانی وەزارەت یاوەری وەزیری ناوخۆی عێراقن.
وەزیری ناوخۆی عێراق گوتی: "لە سەردانەکەدا ژمارەیەک دۆسیە تاوتوێ دەکرێن، تایبەت بە کاری هاوبەش و هاوئاهەنگی و هاوکاری نێوان وەزارتی ناوخۆی عێراق و وەزارەتی ناوخۆی سعودیە، ئەوەش بە ئامانجی پەرەپێدانی هاوکاری بواری ئاسایشی نێوان بەغدا و ریاز."
عێراق و سعودیە نزیکەی 830 کلیۆمەتر سنووری هاوبەشیان هەیە.
عەقید بیلال سوبحی، بەڕێوەبەری راگەیاندن و پەیوەندییە گشتییەکانی بەڕێوەبەرایەتیی گشتیی بەرەنگاربوونەوەی مادە هۆشبەرەکان لە وەزارەتی ناوخۆی عێراق، رۆژی 06-11-2022 لەبارەی بڵاوبوونەوەی مادەی هۆشبەر لە عێراق بە تۆڕی میدیایی رووداوی گوت، "ژمارەی ئەو کەسانەی لە ماوەی 10 مانگی ساڵی 2022دا بە تۆمەتی بەکارهێنان و بازرگانیکردن بە مادەی هۆشبەر دەستگیرکراون 13 هەزار و 680 کەس بووە. تەنیا لە مانگی تشرینی یەکەمیش هەزار و 360 کەس دەستگیر کراون."
بەپێی خەمڵاندنەکانی وەزارەتی ناوخۆی سعودیە، زیاتر لە 200 هەزار کەس لە سعودیە بەکارهێنەری مادەی هۆشبەرن، بەڵام هەندێک لە رێکخراوەکان دەڵێن، ژمارەکە زۆر لەمە زیاترە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ