رووداو دیجیتاڵ
هەڵدانەوەی دووەمین گۆڕی بە کۆمەڵی ئەنفالکراوان لە بیابانی سەماوە کۆتاییهات و رووفاتی 155 کەس دەرهێنرا. نوێنەرێکی گەرمیان لە پەرلەمانی عێراق دەڵێت، بەپێی ئەو بەڵگانەی دۆزراونەتەوە، قوربانییەکان خەڵکی گەرمیانن.
دەزگای شەهیدانی عێراق رایگەیاند، لە ناوچەی تەل شێخە لە پارێزگای موسەننا رووفاتی 155 کەسیان دەرهێناوە.
سەماوە، ناوەندی پارێزگای موسەننایە و دەکەوێتە باشووری عێراق.
دەزگای شەهیدان لە راگەیێندراوێکدا ئاماژەی بەوە داوە، تیمەکانی بەشی گۆڕە بەکۆمەڵەکان و ونبووان، کارەکانی هەڵدانەوەی گۆڕە بەکۆمەڵەکەی قوربانییانی ئەنفالیان لە بیابانی سەماوە - تەل شێخە تەواو کرد.
دەزگای شەهیدان باس لەوە دەکات، ئەو رووفاتانەی دۆزراونەتەوە زۆربەیان ژن و منداڵی کوردن کە لە کاتی شاڵاوی ئەنفال لە ساڵی 1988 لەلایەن رژێمی سەدام حوسێنەوە ئەنفالکراون.
بە گوێرەی دەزگای شەهیدان، 7 گۆڕی دیکەشیان لە هەمان ناوچە دۆزیوەتەوە و هەڵیاندەدەنەوە؛ ئاماژەی بەوەشکرد، ئەگەری دۆزینەوەی گۆڕی بەکۆمەڵی دیکەش لە ناوچەکە هەیە.
چرۆ حەمەشەریف، ئەندامی لیژنەی شەهیدان، قوربانییان و زیندانییانی سیاسی لە پەرلەمانی عێراق، ئەمڕۆ یەکشەممە 19-01-2025، بە تۆڕی میدیایی رووداوی راگەیاند، تاوەکو ئێستا دەزگای شەهیدان بە فەرمی لیژنەکەیانی لەبارەی ئەو گۆڕە بە کۆمەڵەوە ئاگادارنەکردووەتەوە.
ئەندامەکەی لیژنەی شەهیدان دڵنیایە لەو ناوچەیەدا زیاتر لە حەوت گۆڕی بەکۆمەڵی ئەنفالکراوان هەیە.
پێشتر لیژنەکە داوای لە دەزگای شەهیدان کردبوو لەگەڵ دۆزینەوەی هەر گۆڕێکی بەکۆمەڵ بە زووترین کات کارەکانی تەواو بکات و رووفاتەکان بگەڕێندرێنەوە.
هاوکات سروە محەممەد، نوێنەری سنووری گەرمیان لە پەرلەمانی عێراق ئەمڕۆ بە تۆڕی میدیایی رووداوی راگەیاند: "بەپێی ئەو بەڵگانەی لەنێو گۆڕە بەکۆمەڵەکان دۆزراونەتەوە، وەک ناسنامە و جلوبەرگ، رووفاتەکان خەڵکی گەرمیانن".
نوێنەرەکەی گەرمیان دەڵێت، نموونەی خوێن لە کەسوکاری ئەنفالکراوان لە گەرمیان، چەمچەماڵ و کۆیە وەرگیراوە و دەبێت پشکنینی هاوتابوونەوەیان بۆ بکرێت.
بەگوێرەی شیکاری سەرەتایی بەڕێوەبەرایەتیی گۆڕە بەکۆمەڵەکان، رووفاتەکان ژن و منداڵی کوردن، هاووڵاتییەکان جلوبەرگی کوردییان لەبەردا بووە؛ هەروەها بەگوێرەی ئەو شیکارییە کە لە ئاسمانەوە کردوویانە، ئەو ناوچەیە 10 گۆڕی بە کۆمەڵی تێدایە، رەنگە ژمارەی گۆڕەکانیش زیاتربن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ