چاوەڕوان دەکرێت ئەم هەفتەیە سەرۆککۆماری عێراق واژۆ لەسەر پرۆژەیاسای بودجە بکات

 

سەرچاوەیەک لە سەرۆکایەتی کۆماری عێراق ئەمڕۆ (یەکشەممە، 18-06-2023) بە تۆڕی میدیایی رووداوی راگەیاند، "ئەم هەفتەیە د. لەتیف رەشید، سەرۆککۆماری عێراق واژۆ لەسەر پڕۆژەیاسای بودجەی گشتی دەکات"؛  دواتر یاساکە دەنێردرێت بۆ ئەوەی لە رۆژنامەی وەقائیعی عێراقی بڵاوبکرێتەوە. 

 

رۆژی هەینی 16-6-2023، عەتوان عەتوانی، سەرۆکی لیژنەی دارایی پەرلەمانی عێراق گوتی، "یاسای بودجەی ساڵی 2023ـی لەلایەن سەرۆکی پەرلەمانەوە نێردراوە و گەیشتووەتە سەرۆکایەتیی کۆمار بۆ واژۆکردنی".

 

سەرۆککۆماری عێراق دەبێت لە ماوەی 15 رۆژدا واژۆ لەسەر یاسای بودجەی عێراق بکات بۆ ئەوەی دواتر لە رۆژنامەی وەقائیعی عێراقی بڵاوبکرێتەوە و بکەوێتە بواری جێبەجێکردنەوە. 

 

دوای پێنج رۆژ لە گفتوگۆی بەردەوام، بەرەبەیانیی رۆژی دووشەممە 12-6-2023 پەرلەمانتارانی عێراق دەنگیان بە سەرجەم مادەکانی پڕۆژەیاسای بودجەی سێ ساڵی عێراق بۆ ساڵەکانی 2023، 2024 و 2025 دا. 

 

قەبارەی بودجە بۆ هەر ساڵێک نزیکەی 199 تریلیۆن دینارە و ساڵانە 16 تریلیۆن دیناریش لەو بڕە، پشکى هەرێمى کوردستانە.