پەرلەمان دەنگ لەسەر پڕۆژەیاسای بودجە دەدات؛ 15 رۆژ دوای پەسندکردنی پشکی کوردستان دەنێردرێت

 

ئامانج هەرکی، پەرلەمانتاری عێراق بە رووداوی گوت، "لیژنەی دارایی پەرلەمان دوایین کۆبوونەوەکانی لەسەر بودجە ئەنجام دەدات، ئێستا خەریکن دەنگ لەسەر بڕگە و ماددەکان دەدەن، تاوەکو دەنگی کۆتایی لەسەر بدرێت، چونکە زۆربەی کۆبوونەوەکانیان لەگەڵ لایەنی حکومی تەواو بووە، رۆژی شەممە بودجە دێتە پەرلەمان بۆ ئەوەی دەنگی لەسەر بدرێت."

 

بەپێی رێککەوتنی هاپەیمانیی بەڕێوەبردنی دەوڵەت کە لە لایەنەکانی پێکهێنەری حکومەت پێکهاتوون، دەستکاریکردنی پشکی هەرێمی کوردستان یان گۆڕانکاری لە بڕگە و ماددەکانی تایبەت بە هەرێمی کوردستان، دەبێت بە رەزامەندیی هەردوو حکومەتی هەرێمی کوردستان و عێراق بێت، بۆیە چاوەڕوان ناکرێت مەترسی لەسەر پشکی کوردستان دروست بێت.

 

ئیخڵاس دلێمی، جێگری سەرۆکی لیژنەی دارایی پەرلەمانی عێراق دەڵێت، "سەبارەت بە هەرێمی کورستان ئەمڕۆ رێککەوتنی سیاسی لەسەر هەیە لە چوارچێوەی هاوپەیمانێتیی بەڕێوەبردنی دەوڵەت، پلان و بەرنامەی بۆ داڕێژراوە باس لە وردەکارییەکان کراوە کە هەرێم چۆن داهاتی نەوتی و نانەوتی رادەست دەکات، سەرۆکوەزیران ئەمەی پەسەند کردووە لەگەڵ وەزیری دارایی و وەزیری پلاندانان، بۆیە هەر گۆڕانکارییەک بکرێت لە بودجە مەرج ئەوەیە رەزامەندیی هەردوو حکومەتی دەبێت لەسەر بێت."

 

15 رۆژ دوای پەسەندکردنی بودجەی گشتیی عێراق لە پەرلەمان، بودجەکە دەچێتە بواری جێبەجێکردنەوە، بەمەش چاوەڕوان دەکرێت لە کۆتایی مانگی شەشدا دەست بە ناردنی پشکی هەرێمی کوردستان بکرێت کە مانگانە زیاتر لە تریلیۆنێک دینارە.