دوو کەس لەکاتێکدا هەوڵیانداوە هێرشبەرەکە رابگرن، بریندار بوون
رووداو دیجیتاڵ
دوای دروستبوونی دەمەقاڵێ لەنێوان بەرپرسێکی نەخۆشخانەی کازمییە و کارمەندێک، کارمەندەکە بە چەک هەڵدەکوتێتە سەر نەخۆشخانەکە، بەهۆیەوە دوو کەس بریندار دەبن و دوای گەمارۆدانی، خۆی دەکوژێت.
بەگوێرەی زانیارییەکان، سێ رۆژ لەمەوبەر، دەمەقاڵێ لەنێوان کارمەندێک و یاریدەدەری بەڕێوەبەری نەخۆشخانەی فێرکاریی کازمییە لە بەغدا دروستبووە، دواتر پەرەیسەندووە و ئێوارەی دوێنێ (چوارشەممە، 17-1-2024) کارمەندەکە بە چەکی کڵاشینکۆف چووەتە خانەی پزیشکانی نەخۆشخانەکە، دوو کەس لەکاتێکدا هەوڵیانداوە هێرشبەرەکە رابگرن، بریندار بوون.
دواتر هێزە ئەمنییەکان بەمەبەستی دەستگیرکردنی تۆمەتبارەکە کەوتوونە دوای و لە خانوویێکی تەواونەکراوەدا گەمارۆیان داوە، بەڵام گوللەیەکی لەسەری خۆی داوە و خۆی کوشتووە. وەزارەتی تەندروستی دەڵێ لێکۆڵینەوەیان لەسەر رووداوەکە دەستپێکردووە.
د. سەیف بەدر، گوتەبێژی وەزارەتی تەندروستیی عێراق، ئەمڕۆ (پێنجشەممە 18-01-2024) هەواڵەکەی بۆ تۆڕی میدیایی رووداوی پێشتڕاستکردەوە و رایگەیاند، شەوی رابردوو کەسێکی نادیار لە نەخۆشخانەی هەردوو ئیمام کازم تەقەی کردووە، بەهۆیەوە پۆلیسێک و فەرمانبەرێک بریندار بوون، برینی پۆلیسەکە سەختە، دوای ئەوەی هێزە ئەمنییەکان گەمارۆیانداوە، کەسەکە خۆی کوشتوە و، لێکۆڵینەوەش لە رووداوەکە دەستیپێکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ