شاخەوان عەبدوڵڵا: شیعە و سوننە ئیشی زۆریان پێمان ماوە و ناتوانن بێ ئێمە هیچ شتێک تێپەڕێنن

 

 

شاخەوان عەبدوڵڵا، جێگری سەرۆکی پەرلەمانی عێراق دەڵێت، "ئەوان ئیشیان زۆر بە ئێمە ماوە، ناتوانن هیچ شتێک تێپەڕێنن بەبێ ئێمە، چونکە هەموو ئەوانەی کە هەیە بەلای ئەوانەوە قەزیەیە، بەلای ئێمەشەوە وایە. لە کۆبوونەوەی سەرۆکی لیژنەی ماددەی 140 لەگەڵ فراکسیۆنە کوردستانییەکان، بەگشتی هەر پێنج فراکسیۆنەکە لەسەر ئەوە رێککەوتین بۆ ئەم بابەتە دوو رۆژیان پێبدرێت، ئێوارە کورد و شیعە کۆبونەوەیان هەیە، فراکسیۆنە کوردستانییەکان لەگەڵ فراکسیۆنەکانی شیعە، سبەینێش لەگەڵ لیژنەی یاسایی. ئەمە دوا دەرفەتە کە هەر تێبینییەکیان هەیە بیڵێن، ئەم پرۆژەیە تێدەپەڕێنین."

 

سوننەکان پرۆژەیاسای لێبووردنی گشتی مەرجی بەشداریکرنیان بوو لەم کابینەیە، شیعەکان هەموو گوشارەکانیان بۆ گۆڕینی یاسای باری کەسییە و بە ئاشکرا و نهێنی کاری بۆ دەکەن.

 

عەلا حەیدەری، پەرلەمانتاری شيعە دەڵێت، "ئەم یاسایە لە ساڵی 1959 تاوەکو ئەمڕۆ چەند جارێک پێشنیازی هەمواری بۆ کراوە، شۆک بووین بەم هەموارکردنە. لەڕاستیدا لەم هەموارە هیچ پێشێلێکی مافی ژنی تێدا نییە، وەکو ئەوەی بانگەشەی بۆ دەکرێت، نەک هاوسەرگیریی پێشوەختە هەر وەک بانگەشەی بۆ دەکرێت. دەستوەردانی ئاشکرای باڵیۆزی وڵاتانی یەکێتیی ئەورووپا و باڵیۆزی ئەمریکا و باڵیۆزی بەریتانیای تێدایە."

 

فراکسیۆنە کوردستانییەکان دەیانەوێت لە رێگەی ئەم پرۆژەیاسایەوە بڕیارەکانی بەعس، بەتایبەت لە چوارچێوەی تەعریب کە 300 هەزار دۆنم موڵک و ماڵی هاونیشتمانییانی کەرکووک زەوت کرا، بۆ خاوەنەکانیان بگەڕێننەوە.

 

بەڵێن بە فراکسیۆنە کوردستانییەکان دراوە دەنگ لەسەر پرۆژەیاسای گێڕانەوەی موڵک بۆ خاوەنەکەی بدەن، تاوەکو ئێستا دیار نییە ئەم بەڵێنە هاوشێوەی ئەو بەڵێنە دەبێت کە بۆ پرۆژەیاسای بەپارێزگابوونی هەڵەبجە پێیان درابوو، یاخو نا؛ لە رۆژانی داهاتوودا ئەمە روون دەبێتەوە.