دادگەی فیدراڵیی عێراق پشتیوانی بۆ هەموارکردنەوەی یاسای باری کەسی راگەیاند

 

دادگەی فیدراڵیی عێراق، رۆژی سێشەممە 17ـی ئەیلوولی 2024، هەڵوێستی خۆی لەبارەی پڕۆژەیاسای هەمواری یاسای باری کەسیی ژمارە 188ـی ساڵی 1959 راگەیاند. 

 

دادگەکە شیکردنەوەکەی لەسەر داوای موحسین مەندەلاوی، جێگری سەرۆکی پەرلەمانی عێراق بڵاوکردووەتەوە کە رۆژی 18ـی ئابی ئەم ساڵ داوایکرد دادگەکە شیکردنەوە بۆ دەقی مادەی 41ـی دەستووری عێراق بکات کە دەڵێت، "عێراقییەکان ئازادن لە پابەندبوون بە باری کەسییانەوە بە گوێرەی ئایین یان مەزهەب یان بیروباوەڕ".

 

داواکارییەکەی مەندەلاوی دوای ئەوە هات پڕۆژەیاسای هەمواری یاسای باری کەسیی عێراق لە پەرلەمان مشتومڕی نایەوە.

 

دادگەی فیدراڵیی عێراق لە روونکردنەوەکەیدا دەڵێت، نابێت هیچ دەقێکی یاسایی یان دەقی دەستووریی هەرێمەکان دژی دەقەکانی دەستووری وڵات بێت؛ ئاماژە بەوەش دەکات، ئەگەر دەقی لەو جۆرە هەبێت، بە پووچەڵ هەژمار دەکرێت.

 

دادگەی فیدراڵیی عێراق ئاماژە بەوە دەکات، "دەستووری عێراق گەرەنتی مافە ئایینییەکانی سەرجەم رۆڵەکانی کردووە، بەتایبەت ئەوەی پەیوەندیدارە بە ئازادیی بیروباوەڕ و سرووتە ئاینییەکانەوە و نابێت پێشێلکاریی ئەو مافانە بکرێت."

 

بە گوێرەی دادگەکە، "دەستوور ئازادیی رێکخستنی باری کەسیی بەپێی ئایین یان مەزهەب یان بیروباوەڕ یان بەپێی هەڵبژاردەی کەسی بە عێراقییەکان بەخشیوە و نابێت ئەنجامدانی ئەو کارە سنووردار بکرێت یان رێگەی لێبگیرێت، تەنیا بە یاسا نەبێت، بەو پێیەی نابێت ئەو سنووردارکردن یان قەدەخەکردنە کرۆکی رەوایەتی یان ئازادییەکان وەک ئەوەی لە مادەی 46دا هاتووە پێشێل نەکات". 

 

رۆژی 4ـی ئابی 2024، پەرلەمانی عێراق خوێندنەوەی یەکەمی بۆ رەشنووسی هەمواری یاسای باری کەسی کرد کە هەنگاوەکە رووبەڕووی رەخنە بووەوە.

 

رۆژی 17ـی ئابی 2024ـیش رێکخراوى چاودێریی مافەکانی مرۆڤ (هیومەن رایتس وۆچ) رایگەیاند، هەمواری یاسای باری کەسی رێگە بە مەرجەعەکانی ئایینی دەدات لەبری یاساکانی دەوڵەت، کاروباری هاوژینی و میرات دژی مافە بنەڕەتییەکان رێکخبەن.