شیعەکان داوای پشووی رۆژی غەدیر و سوننەکانیش داوای پشووی رۆژی سەقیفە دەکەن

 

 

جەواد موسەوی، پەرلەمانتاری پێشووی رەوتی سەدر دەڵێت، "ئەمە دڕکێکە بۆ ناو چاوی تایفەگەری و حکومەتی بەنی عەباس. هاتووین بۆ پشتیوانیکردن لە داواکانی رەوتی نیشتمانیی شیعی. بەڵێ، دووپاتی دەکەمەوە، رەوتێکی نیشتمانیی شیعی. داواکەمان بریتییە لە پەسندکردنی یاسایەک بۆ راگەیاندنی پشوویەکی فەرمی بەناوی رۆژی غەدیر بۆ هەموو عێراقییەکان. ئێمەش ئەمڕۆ گردبووینەتەوە بۆ بەجێگەیاندنی هەموو ئامانجێکی رەوتەکەمان."

 

لە دیوی رەسافەش لە ناوچەی ئەعزەمییە-ی زۆرینەی شیعە و لەناو مزگەوتی ئەبی حەنیفە نوعمان، بە تووندی و بە ئاشکرا پشووی رۆژی غەدیر رەتکرایەوە. پێشنوێژی مزگەوتەکە لە گوتاری هەینیدا داوای لە هەمووان کرد رێز لە ناسنامەی نیشتمانی و پێکهاتەکانی دیکە بگیرێت. داواش دەکات، رۆژی دەستبەکاربوونی عومەری کوڕی خەتاب وەکو ئەمیری باوەڕداران لەبری جەژنی غەدیر، ئەم بۆنەیە بەناوی رۆژی سەقیفە بکرێتە جەژن.

 

شێخ وەهاب سامەڕایی، پێشنوێژ و گوتارخوێنی مزگەوتی ئەبی حەنیفە نوعمان گوتی، "یان ئەوەتا رێز لە هەموو ناسنامەکان دەگریت، رۆژی غەدیر و رۆژی سەقیفە کە دەکاتە رۆژی دەستبەکاربوونی عومەری کوڕی خەتاب وەکو ئەمیری بڕوادارن پێکەوە بە جەژن دەناسێنیت و دانی پێدا دەنێیت، یان ئەوەتا قبووڵی ناکەین. کێ پێی خۆشە و کێ پێی ناخۆشە کەیفی خۆیەتی، ئاینەکەم رێگەم پێنادات چاوپۆشی لە بێڕێزییەکان بکەم. رێزم لێبگریت و رێز لە پێکهاتە و ناسنامەم بگریت و رێز لە ناسنامەی نیشتمانیی عێراقی بگریت، ئەوکات دەتخەمە سەر سەر و سەر چاوانم."

 

لێدوانی دژبەیەک لێرە و لەوێ لەبارەی پشووی رۆژی غەدیر دۆخەکە بەرەو هەڵکشان دەبات. ئەمەش لە کاتێکدایە هەموو چاوەکان روو لە ئەنجوومەنی نوێنەرانە بۆ دۆزینەوەی دەرچەیەکی یاسایی.

 

پەیامی سەدر بە هەموو نوێژخوێنەکان گەیشت؛ ئەوانیش لە گۆڕەپانەکاندا پابەندبوونیان بۆ هەموو فەرمانێکی کۆمەڵایەتی و سیاسیی سەدر راگەیاند.