گوتەبێژی کۆمیسیۆن کاتی راگەیاندنی ئەنجامی هەڵبژاردنی ئەنجوومەنی پارێزگاکان بۆ رووداو ئاشکرا دەکات

 

 

جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق میوانی بووڵتەنی کاژێر 12:00ـی تۆڕی میدیایی رووداو بوو و گوتی، "ئەمڕۆ کۆمیسیۆنی باڵای سەربەخۆی هەڵبژاردنەکان، دەرگای 565 بنکەی دەنگدانی کردەوە بۆ پێشوازیکردن لە هێزە ئەمنییەکان و سوپا کە ژمارەیان سەروو یەک ملیۆن دەنگدەرە؛ هەروەها 35 بنکەی دەنگدانی بۆ ئاوارەکان کردەوە، کە ژمارەیان سەروو 48 هەزار دەنگدەر دەبێت. پڕۆسەکە بەشێوەیەکی زۆر رێکخراو و باش بەڕێوەدەچێت. بنکەکانی دەنگدان لەلایەن لیژنەی ئەمنیی کۆمیسیۆن و هێزە ئەمنییەکانەوە پارێزراون".

 

لەبارەی ئامێرەکان، جومانە غەلای گوتی، "هیچ جۆرە کێشەیەک لە ئامێرەکانی دەنگداندا نییە. هەموو ئامێرەکان پێشتر پشکنینیان بۆ کراوە و تاقیکراونەتەوە و هەر کێشەیەک هەبووبێت چارەسەر کراوە. سەرجەم ئامێرەکان کار دەکەن، بەڵام سەرباری ئەوەش کۆمیسیۆن هەمیشە رێکاری پێویست دەگرێتەبەر لە رێگەی لیژنەی تەکنیکییەوە کە کەسانی پسپۆڕ و شارەزان و کارمەندی کۆمیسیۆنن. ئەو لیژنانە بەشێوەیەکی بەردەوام پەیوەندییان لەگەڵ سەرجەم بنکەکانی دەنگدان هەیە بۆ بەدەمەوەچوونی هەر جۆرە کارێکی چاوەڕواننەکراو یان هەر هەڵەیەکی تەکنیکی. رەنگە کارمەندانی کۆمیسیۆن پرسیارێکیان لەبارەی ئامێرەکان هەبێت و ئەوانیش دەستبەجێ وەڵامیان دەدەنەوە و کێشەکەیان بۆ چارەسەر دەکەن. دووپاتی دەکەمەوە، بە هیچ شێوەیەک کێشە لە ئامێرەکاندا نییە".

 

سەبارەت بە کێشەی کارتەکانی بایۆمەتری، گوتەبێژی کۆمیسیۆنی باڵای سەربەخۆی هەڵبژاردنەکانی عێراق رایگەیاند، "سەرجەم کارتەکانی بایۆمەتری پشکنینیان بۆ کراوە و دڵنیاین لە داتا و زانیارییەکان پێش ئەوەی رادەستی دەنگدەرانیان بکەین. کارتەکانی پێشتریش بە هەمان پڕۆسەدا تێپەڕیون. هەندێکجار کە ئامێرێک کارتێک ناخوێنێتەوە، تیمە تەکنیکییەکان داوا لە کارمەندەکە دەکەن، سیمکارتەکەی خاوێن بکاتەوە چونکە رەنگە پیس بووبێت. لە بەیانییەوە چەندین جار پەیوەندی بە ناوەندی تەکنیکی کۆمیسیۆنەوە کراوە و ئەوانیش پێیان راگەیاندوون کە دەبێ سیمکارتەکە خاوێن بکەنەوە بۆ ئەوەی ئامێرەکە بیخوێنێتەوە. تیمە تەکنیکییەکان پەیوەندییان بە سەرجەم بنکەکانی دەنگدانی هێزە ئەمنییەکان و ئاوارەکانەوە کردووە کە بەر لە بەکارهێنانی کارتی بایۆمەتری، هەوڵ بدەن سیمکارتەکان خاوێن بکەنەوە. وەک گوتم، ئەگەر کێشەیەک هەبێت، ئەوە یان کارمەندەکە شارەزا نییە یان سیمکارتەکە پیس بووە و دەبێ خاوێن بکرێتەوە. بۆیە ئەگەر ئامێرەکە کارتی بایۆمەتری نەخوێنێتەوە، خاوەن کارتەکە لە دەنگدان بێبەش دەبێت. بێ نەخوێندنەوەی کارتی بایۆمەتریش کەس مافی نییە دەنگ بدات و نەکراوە و ناشکرێت".

 

گوتەبێژی کۆمسیۆنی باڵای سەربەخۆی هەڵبژاردنەکان ئاماژەی بەوەشکرد، "هەڵبژاردنی 2021 سەرکەوتنی زۆر گەورەی ئەم سیستمەی دەرخست و هیچ جۆرە کێشەیەکی نەبوو کە گومان بخاتە سەر راست و دروستی هەڵبژاردنەکە. ئەمڕۆش کۆمیسیۆن 100% ئامادەیە بۆ بەڕێوەبردنی هەڵبژاردنەکە، چونکە ئامادەکارییەکان لەسەر ئاستێکی زۆر باڵا کراون لە رێگەی سیستمێکی زۆر پێشکەوتوو. جگە لەوە، چاودێرانی لایەنە سیاسییەکان و چاودێریی نێودەوڵەتی؛ هەروەها میدیاکارانی نێوخۆ و نێودەوڵەتی، زامنی شەفافییەت و سەرکەوتنی پڕۆسەکە دەکەن. هەروەها دوو کامێرا لە هەر وێستگەیەک و چوار کامێراش لە هەر بنکەیەک دانراون. سەرجەم ئەم ئامرازانە دەرخەری ئەوەن کۆمیسیۆن بەهەموو شێوەیەک دەیەوێت هەڵبژاردنێکی شەفاف و بێگەرد بەڕێوەببات". 

 

جومانە غەلای هەروەها گوتی، "ئەو دەنگدەرەی ناوی لە هەڵبژاردنی تایبەت هەیە و نەچووەتە دەنگدان، لە رۆژی هەڵبژاردنی گشتیدا مافی دەنگدانی نابێت، بەهۆی ئەوەی کارتەکەی نایخوێنێتەوە"؛ باسی لەوەشکرد، "کاژێر شەش پڕۆسەی دەنگدان کۆتاییدێت، ئامێرەکان لەو کاژێرەدا دەکوژێنەوە و کارمەندانی کۆمیسیۆن کۆپییەک لە راپۆرتێکی ئەلیکترۆنی رادەستی نوێنەرانی لایەنە سیاسییەکان دەکەن. دواتر سندووقەکان دەکرێنەوە و ژماردنی دەستی ئەنجام دەدرێت. ئەنجامی بەرایی ئەم هەڵبژاردنە تایبەتەش لەگەڵ ئەنجامی بەرایی هەڵبژاردنی گشتی رادەگەیێندرێت، ئەوەش دوای 24 کاژێر دوای کۆتاییهاتنی هەڵبژاردنی گشتی". 

 

بۆ هەڵبژاردنی گشتیی ئەنجوومەنی پارێزگاکانی عێراق کە 18ـی ئەم مانگە بەڕێوەدەچێت، 16 ملیۆن و 158 هەزار و 788 کەس مافی دەنگدانیان هەیە.