رێکارە ئەمنییە تووندەکان لە فڕۆکەخانەی بەغدا هەڵدەگیرێن

 

 

ئەمڕۆ هەینی 16ی ئابی 2024 مەیسەم سافی، گوتەبێژی وەزارەتی گواستنەوەی عێراق بە تۆڕی میدیایی رووداوی گوت، "رۆژی شەممە 17ی ئاب، بە فەرمی فڕۆکەخانەی نێودەوڵەتیی بەغدا وەکو هەر فڕۆکەخانەیەکی دیکەی جیهان، رێکارە ئەمنییە تووندەکانی لادەبرێن و گەشتیاران دەتوانن بە ئاسانی لە رێگەیەوە گەشتەکانیان ئەنجام بدەن."

 

مەیسەم سافی گوتی، "دوای دەرکردنی رێنوێنییەک لەلایەن سەرۆکوەزیرانەوە، لیژنەی باڵای ئاسایشی فڕۆکەخانەکان کۆبوونەوەیان کرد و تێیدا بڕیاردرا رۆژی شەممە کاژێر 8ی بەیانی فڕۆکەخانەکە بە تەواوی بکرێتەوە و دۆخە نائاساییەکەی هەڵبگیرێت."

 

گوتەبێژی وەزارەتی گواستنەوەی عێراق گوتی، "رێڕەوی چوونە ژوورەوە بۆ فڕۆکەخانە بەسەر 6 رێڕەودا دابەشدەکرێت کە بەم شێوەیە دەبێت؛ هاتووان، رۆیشتووان، فەرمانبەران، بارهەڵگران، کۆمپانیای تەکسی رێگەپێدراو و هەڵگرانی باجی تایبەت. هەریەکە لەوانە رێڕەوێکی تایبەتی دەبێت. جگە لەوەی رێگە بە هاووڵاتییان دەدرێت بۆ پێشوازی گەشتیاران بچنە نێو گۆڕەپانی فڕۆکەخانەکە، بێ ئەوەی داوای وڵاتینامە و کارتی نیشتمانییان لێبکرێت، بەڵکو رێکارەکان بەشێوازی رێکخراو و ئاسایی دەبن."

 

لە ساڵی 2003ەوە رێکاری ئەمنی تووند لە فڕۆکەخانەی نێودەوڵەتی بەغدا دەگیرێتەبەر، بەشێوەیەک هاتووچۆی گەشتیاری زەحمەت کردووە.

 

بۆ چوونە نێو فڕۆکەخانەی بەغدا، بە چەندین خاڵی پشکنین تێدەپەڕیت کە جگە لە وردبوونەوە لە ناسنامە، پشکنینی خەڵک و ئۆتۆمبێل و هەموو جۆرە جانتایەک دەکرێت، ئەگەر کەسەکە گەشتیار بێت یان بۆ پێشوازی لە گەشتیار بچێت.

 

هەروەها لەو کاتەوە رێگەنەدراوە گەشتیار یان ئەو کەسانەی بۆ پێشوازی گەشتیار دەچن، بە ئۆتۆمبێلی خۆیان یان تاکسی بگەنە بەردەم دەرگای فڕۆکەخانە؛ دوایین شوێن کە دەتوانن پێی بگەن گۆڕەپانێکە لە دەرەوەی فڕۆکەخانە بە ناوی گۆڕەپانی (عەباس بن فرناس) و لەوێوە دەبێت بە تاکسی تایبەتی فڕۆکەخانە بچنە ژوورەوە.

 

بۆ چوونە ژوورەوە بۆ نێو فڕۆکەخانەی بەغدا، هاووڵاتی لانیکەم بە چوار قۆناخی پشکنیندا تێدەپەڕێت، کە دووانیان سەگی تایبەت تێیاندا بەکاردەهێندرێت.