رووداو دیجیتاڵ
بڕیارە سبەی شەممە، لە 18 پارێزگاکەی عێراق و هەرێمی کوردستان دەنگدانی تایبەت بۆ هەڵبژاردنی ئەنجوومەنی پارێزگاکانی 15 پارێزگای عێراق بەڕێوەبچێت، لە دەنگدانی تایبەت هێزە ئەمنییەکان و ئاوارەکان دەنگدەدەن و بەرپرسێکی کۆمیسیۆنیش رایدەگەیەنێت سەرجەم ئامادەکارییەکانی هونەری، یاسایی، ئەمنی تەواوبوون، دەشڵێت، "لە تاقیکردنەوەی پێنجەمدا پڕۆسەکە هیچ کێشەیەک تۆمارنەکراوە."
رۆژی هەینی، 15-12-2023، عیماد جەمیل، سەرۆکی تیمی میدیایی کۆمیسیۆنی باڵای سەربەخۆی هەڵبژاردنەکانی عێراق بە تۆڕی میدیایی رووداوی رایگەیاند: "رۆژی شەممە، 16-12-2023، پڕۆسەی دەنگدانی تایبەت بۆ هەڵبژاردنی ئەنجوومەنی پارێزگاکان بەڕێوەدەچێت، کە بەپێی ئامارەکانی کۆمیسیۆنی هەڵبژاردن لە هێزە ئەمنییەکان بە سەرجەم بەش و جۆر و وەزارەت و دامەزراوەکانییەوە یەک ملیۆن و 2 هەزار و 393 کەس مافی دەنگدانیان هەیە و بەسەر 565 بنکە و 2367 وێستگەی دەنگدان دابەشبوون.
سەبارەت بە ئاوارەکانیش، عیماد جەمیل گوتی: "48 هەزار و 260 ئاوارە مافی دەنگدانیان هەیە، کە 120 وێستگەی دەنگداندا دەتوانن دەنگ بدەن"
دەنگدانت تایبەت لە کاژێر 7:00ـی بەیانی دەستپێدەکات و کاژێر 6:00ـی ئێوارە بنکەکانی دەنگدان دادەخرێن، لە پارێزگاکانی هەرێمی کوردستان: هەولێر، سلێمانی و دهۆک دەنگدانی تایبەتی هێزە ئەمنییەکان و ئاوارەکان بەڕێوەدەچێت.
ئەو بەرپرسەی کۆمیسیۆن ئاماژەی بەوەدا سەرجەم ئامادەکارییەکانیان بۆ دەستپێکردنی پڕۆسەی دەنگدان تەواو بوون و روونیکردەوە: "لە دوایین تاقیکردنەوەی کۆمیسیۆن و خۆ ئامادەکاریی بۆ پڕۆسەی هەڵبژاردنی ئەنجوومەنی پارێزگاکان کە رۆژی سێشەممە، 12ـی ئەم مانگە بەڕێوەچوو، هیچ هەڵە و کەموکورتییەک تۆمارنەکرا و سەرکەوتنی پڕۆسەکە مسۆگەرە."
بۆ هەڵبژاردنی ئەنجوومەنی پارێزگاکانی عێراق کە بڕیارە 18ـی ئەم مانگە لە 14 پارێزگای عێراق و پارێزگای کەرکووک بکرێت، 16 ملیۆن و 158 هەزار و 788 کەس مافی دەنگدانیان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ