گوتەبێژی کازمی: بکوژانی هیشام هاشمی ناسراونەتەوە و چوونەتە دەرەوەی وڵات

 

 

ئەحمەد مەلا تەڵاڵ، گوتەبێژی سەرۆکوەزیرانی عێراق لە بەرنامەیەکی کەناڵی ئەلعێراقییە، رایگەیاند، هێزێکی ئەمنی لەکاتی لێکۆڵینەوەکاندا لەبارەی کوژرانی هیشام هاشمی، شارەزای ئەمنی، لە شاری بەغدا ئەو دوو ماتۆڕسکیلەیان دەستبەسەرداگرتووە، کە لە تیرۆرکردنی هیشام هاشمی بەکارهێنراون، دوو لەو کەسانەی کە لێیانخوڕیوون لە کردەوەکەدا ناسراونەتەوە، بەڵام دواتر دەرکەوتووە هەردووکیان لەلایەن لایەنێکەوە براونەتە دەرەوەی عێراق.

 

گوتەبێژەکەی مستەفا کازمی دووپاتیکردەوە، سەرۆکوەزیرانی عێراق بەڵێنی داوە ئەو تاوانبارانە دەستگیربکات، "ئەگەر هاتوو بۆ دەرەوەی عێراقیش هەڵاتبن، ئەوا دەستگیردەکرێن و دەیانگەڕێننەوە و یاسایان بەسەردا جێبەجێ دەکەن".

 

ئێوارەی دووشەممە 06-07-2020، هیشام هاشمی لەبەردەم ماڵەکەیدا لە ناوچەی زەیونە لە بەغدا لەلایەن چەند چەکدارێکەوە تەقەی لێ کرا و تیرۆرکرا.

 

بەپێی ئەو دیمەنانەی لە کامێرای چاودێرییەوە دەرکەوتوون، هاشمی ئۆتۆمبێلێکی جۆری پرادۆی پێیە و دەگەڕێتەوە ماڵەوە، پێش ئەوەی دابەزێت چەکدارەکان بە سواری ماتۆڕەوە لەبەردەم ماڵەکەی چاوەڕێی دەکەن، دوای گەڕانەوەیشی بۆ ماڵەوە لەنێو ئۆتۆمبێلەکەی تەقەی لێدەکەن و گولـلە بەر سەری و سکی دەکەوێت و دەکوژرێت.