رووداو دیجیتاڵ
شاندەکەى هەرێمى کوردستان بە نووسراوى فەرمى وەڵامى تێبینییەکانی وەزارەتى داراییی فیدراڵیان بردووەتە بەغدا، بۆ ناوى دووبارە ناوى دایکى فەرمانبەرەکانیان بردووە. بۆ چارەسەرى کێشەى فەرمانبەرانی ناوچە کوردستانییەکانیش وردبینى لەوە دەکرێت کە لە هەردوولا مووچەیان نەبێت.
بەگوێرەى ئەو زانیارییانەى تۆڕى میدیایی رووداو لە سەرچاوەیەکى حکومەتى هەرێمى کوردستانەوە دەستى کەوتوون، ئەو شاندەى هەرێمى کوردستان کە لە بەغدان بە نووسراوى فەرمى وەڵامى تێبینییەکانى وەزارەتى دارایی فیدراڵیان بردووە کە لەسەر لیستى مووچە هەیانبووە و بەهۆیەوە 305 ملیار دینارى پارەى مووچەى مانگى ئەیلوول نەنێردراوە.
ئەو تێبینییانەى بەغدا هەیبوون تایبەت بوون بە پۆلیسی کارەبا، زیادبوونى پێنج فەرمانبەر بۆ لیستى مووچەى پەرلەمانى کوردستان، ناوى دووبارە، بایۆمەترى، فەرمانبەرانى هەرێمى کوردستان لە ناوچە کوردستانیەکانى ژیر دەسەڵاتى حکومەتى فیدراڵى.
سەرچاوەیەکى بەرپرس لە حکومەتى هەرێمى کوردستان بە رووداوى گوت: "بە نووسراو وەڵامى تێبینییەکان لە بارەى ئەو پێنج فەرمانبەرەى پەرلەمان براوە بۆ بەغدا و بە نووسراویش ئەوە روونکراوەتەوە، کە پۆلیسی کارەبا لەسەر لیستى مووچەى وەزارەتى کارەبا لادراون و خراونەتەوە سەر وەزارەتى ناوخۆ. بۆ ناوى دووبارەش، ناوى دایکى ئەو فەرمانبەرانەیان ناردووە بۆ ئەوەى وردبینیى تێدا بکەن تاوەکو ئەوە روون ببێتەوە، کە ئەو ناوە دووبارانە یەک کەس نین و جیاوازن."
بەگوێرەى راپۆرتێکى هاوبەشی دیوانى چاودێرى دارایی عێراق و هەرێمى کوردستان کە لە 21ى تەممووز ئاراستەی نووسینگەى سەرۆکوەزیرانى عێراق کراوە، ئاماژە بە ناوى سیانی 65 فەرمانبەر کراوە کە لە دوو وەزارەتى جیاواز مووچە وەردەگرن.
یەکێک لە تێبینییەکانى دیکەى بەغدا، فەرمانبەرانى هەرێمى کوردستان بووە لە سنوورى ناوچە کوردستانییەکان، بەگوێرەى زانیارییەکان وەزارەتى دارایی فیدراڵ دەستى بە وردبینی کردووە بۆ ئەوەى بزانێت ئەو فەرمانبەرانەی لەیەک کاتدا مووچە لە حکومەتى هەرێمى کوردستان و دامەزراوەکانى سەر بە حکومەتى فیدراڵى وەردەگرن.
هەرێمى کوردستان مانگانە پێویستى بە 988 ملیار دینارە بۆ مووچە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ