رووداو دیجیتاڵ
گەمارۆسازی و ژمارەلێدانى خانوو، شوقە و باڵەخانەکان لە عێراق لە چوارچێوەى سەرژمێریى گشتیی دانیشتووان بۆ کۆتایی ئەم مانگە دواخرا. ئەو کارە بڕیار بوو 15ى تەممووز دەستپێبکات و دوو مانگ بخایێنێت.
عەبدولزەهرە هینداوى، گوتەبێژى وەزارەتى پلاندانانى عێراق ئەمڕۆ دووشەممە بە تۆڕى میدیایی رووداوى رایگەیاند، دەبوو ئەمڕۆ 15ى تەممووز گەمارۆسازی و ژمارەلێدانى خانوو، شوقە و باڵەخانەکان دەستپێبکات، بەڵام بۆ کۆتایی ئەم مانگە دواخرا و دەکرێت 29 یان 30ى تەممووز دەستپێبکات.
لەو پڕۆسەیەدا تیمەکانى سەرژمێرى بەسەر چەند بلۆکێکدا بۆ گەمارۆسازی و ژمارەلێدان دابەش دەکرێن؛ هەر بلۆکێک خانوو، شوقە و باڵەخانەکانى سنوورەکەى دەگاتە 120 دانە.
عەبدولزەهرە هینداوى رایگەیاند، دواخستنەکە بەهۆى تاقیکردنەوەکانی ئەم دواییە و ئامادەکارییەکان بۆ رێوشوێنى چلەى ئیمام حوسێن و مەشقپێکردنى ژمێرکارەکان بووە.
گەمارۆسازی و ژمارەلێدان یەکەم هەنگاوى کردارییە بۆ ئەنجامدانى سەرژمێرى گشتیى دانیشتوان کە 20ى تشرینى دووەمى ئەم ساڵ بۆ ئەنجامدانى دیاری کراوە.
31ى ئایار سەرژمێریى ئەزموونى لە عێراق و هەرێمى کوردستان لە چەند گوند و شارۆچکەیەک دەستیپێکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ