ئەمینداری پارتی داعی: گومان دەکەین لایەنێکی دەرەکی دامەزرێنەری پارتەکەمانی تیرۆر کردبێت

 

پاشنیوەڕۆی رۆژی پێنجشەممە، 7-12-2023، لە شەقامی ئیبن مەنزووری ناوچەی تاجیاتی بەغدا، فازڵ مەرسوومی، دامەزرێنەری پارتی داعی، لەلایەن دوو چەکدارەوە کوژرا.

 

شەوی چوارشەممە، 13-12-2023، سەعد جاسم تمێمی، ئەمینداری گشتیی پارتی داعی، بە تۆڕی میدیایی رووداوی راگەیاند، "حکومەتی عێراق لیژنەیەکی لە وەزارەتی ناوخۆ بۆ بەدواداچوون و لێکۆڵینەوە لە رووداوی تیرۆرکردنی دامەزرێنەری پارتی داعی پێکهێناوە، لەگەڵ ئێمە پەیوەندییان کردووە و زانیارییان وەرگرتووە، بەڵام تائێستا هیچ زانیاری و سەرەداوێکیان لەبارەی تیرۆرکردنەکە و بکەرانی و ئەو لایەنەی لە پشتییەوەیەتی پێنەداوین."

 

ئەمینداری گشتیی پارتی داعی گوتی، "گومانمان هەیە لایەنێکی دەرەکی لە پشت کوشتنی دامەزرێنەری پارتەکەوە بێت." دەشڵێت، "هەڵوێستی دامەزرێنەر و پارتەکەشمان ئەوەیە دژی تایفەگەرین، دژی چەکی بێمۆڵەتین، دژی بەکرێگیراوکردنین بۆ بیانی، دژی بڵاوبوونەوەی ئەو هەموو سیخوڕەین کە عێراقیان دەستەوەستانکردووە. داوامان لە پەرلەمانی عێراق کرد یاسایەک بۆ قەدەخەکردنی بەکرێگیراوی بۆ وڵاتانی دیکە و لایەنی دەرەکی دەربکات، ئەم هەڵوێستانە لەو هۆکارانە بوون کە خەڵک و لایەنی دیکەی قەڵس کردووە و لە هۆکارەکانی کوشتنی دامەزرێنەرن."

 

سەعد جاسم تمێمی، ئەمینداری گشتیی پارتی داعی، هەڵوێستی حکومەتی عێراقی بە"بێدەنگیی ترسناک" وەسفکرد و باسی لەوە کرد "زۆر لامان سەیرە کە سەرۆکی پارتێکی سیاسیی لەناو جەرگەی بەغدا و لە گەرمەی بانگەشەی هەڵبژاردن تیرۆر دەکرێت."

 

رۆژی پێنجشەممە، 7-12-2023، لە شەقامی ئیبن مەنزووری ناوچەی تاجیاتی بەغدا، دوو چەکدار کە ماتۆڕسکیلێکیان پێبووە، تەقەیان لە فازڵ مەرسوومی، دامەزرێنەری حیزبی داعی کرد و کوشتیان.

 

مەرسوومی، بەرهەڵستکاری حیزبە حوکمڕانەکانی دوای ساڵی 2003ـی عێراق بوو، بانگەشەی بۆ سنووردارکردنی میلیشیاکان و هێشتنەوەی چەک لە دەستی دەوڵەت دەکرد، بەشێک لە شیعەکان و گرووپە چەکدارەکانیشن بە پیاوێکی "گومڕا" ناویان دەهێنا.