دیمەنێکی کاتی شەڕەکە
رووداو دیجیتاڵ
شەڕ لەنێوان چەند خێزانێکی ئاوارەی سووریی دانیشتووی بەغدا دروستبوو. گوتەبێژی وەزارەتی ناوخۆی عێراقیش دەڵێت، 35 پیاو، ژن و منداڵیان بە تۆمەتی شەڕەکە دەستگیر کردووە.
ئەمڕۆ شەممە، 14ی ئەیلوولی 2024 عەمید میقداد میری، گوتەبێژی وەزارەتی ناوخۆی عێراق بە تۆڕی میدیایی رووداوی راگەیاند، "دوای ئەوەی سەر لە ئێوارەی ئەمڕۆ شەڕ و پێکدادان لەنێوان چەند خێزانێکی بە رەچەڵەک سووریایی دانیشتووی گەڕەکی بەتاوینی بەغدا روویدا، هێزەکانی پۆلیسی رەسافە گەیشتنە شوێنی رووداوەکە و توانییان 35 تۆمەتبار دەستگیر بکەن."
گوتیشی، "شەڕەکە بەهۆی کێشەیەکی کۆمەڵایەتیی نێوانیان بووە و تۆمەتبارەکان پیاو، ژن و منداڵن، کە ژمارەیەکیان لە شەڕەکەدا برینداربوون، بەڵام برینەکانیان سەخت نییە و چارەسەری پزیشکیی پێویستیان بۆ کراوە."
گوتەبێژی وەزارەتی ناوخۆ ئاماژەی بەوەش کرد، "تۆمەتبارەکان بەپێی بڕیاری دادگە لە بنکەی پۆلیسی رەسافە راگیراون و پەڕاوی لێکۆڵینەوە بۆ رووداوەکە کراوەتەوە."
وەکو لەو گرتە ڤیدیۆییەی لە تۆڕەکۆمەڵایەتییەکان بڵاوکراوەتەوە، دەردەکەوێت؛ پیاو و ژن و منداڵ بە دار و ئاسن بە تووندی لە یەکدی دەدەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ