مەسرور بارزانی لەبارەی مووچەی هەرێمی کوردستان: ئیشەڵڵا موژدەی خێرمان پێدەبێت

 

شەوی پێنجشەممە، مەسرور بارزانی، سەرۆکوەزیرانی هەرێمی کوردستان لەدوای کۆبوونەوەی لەگەڵ لایەنە سیاسییەکان و بەرپرسانی حکومەتی عێراق، لە کۆنفڕانسێکی رۆژنامەڤانیدا لە بەغدا رایگەیاند، "بۆ چارەسەری درێژخایەن، لەوانەیە پێویستی بە تەشریع و هەندێ گۆڕانکاری و هەموارکردنی هەندێ یاسا هەبێت کە بەیەکەوە دواتر کاری زیاتری لەسەر دەکەین."

 

سەرۆکوەزیرانی هەرێمی کوردستان لەبارەی پێشنیازی دووەمیشەوە گوتی: "بۆ چارەسەری ئێستا، دیارە لە یەکشەممەی داهاتوو کۆبوونەوەی ئەنجوومەنی وەزیران دەکرێ؛ هەر بۆ ئەم بابەتەش چەندین پێشنیازمان خستووەتەڕوو و پێشوازی لێکراوە و هەموو لایەنە سیاسییەکانی دیکە کە دیاریشمان کردووە لەگەڵیان، ئامادەیی خۆیان دەربڕیوە بۆ پاڵپشتیکردنی و پشتیوانیکردن لەو پێشنیازەی کە هەمانبووە، کە بتوانین دواتر مووچەکانی خەڵکی کوردستان دابین بکەین بۆ ئەم ساڵ و ئیشەڵڵا موژدەی خێرمان پێدەبێت و چاوەڕوانی کۆبوونەوەی رۆژی یەکشەممە دەبین. هیوادارین ئەو ئامادەکارییانە هەمووی ببن بە بڕیار."

 

رۆژی  پێنجشەممە، 14-9-2023، شاندێکی حکومەتی هەرێمی کوردستان بۆ تاوتوێکردنی کێشە داراییەکانی نێوان هەرێمی کوردستان و حکومەتی ناوەند گەیشتنە بەغدا، شاندەکەی هەرێمی کوردستان مەسرور بارزانی سەرۆکایەتی دەکات و قوباد تاڵەبانی، جێگری سەرۆکوەزیران، رێبەر ئەحمەد، وەزیری ناوخۆ، ئاوات شیخ جەناب، وەزیری دارایی، ئومێد سەباح، سەرۆکی دیوانی سەرۆکایەتیی ئەنجوومەنی وەزیران، ئامانج رەحیم، سکرتێری ئەنجوومەنی وەزیران و پێشەوا هەورامانی، گوتەبێژی حکومەتی هەرێمی کوردستان ئەندامانی شاندەکەن.

 

شاندى حکومەتى هەرێمى کوردستان جگە لە سوودانى، لەگەڵ سەرۆککۆمار، سەرۆکى پەلەرمان، هەریەکە لە نوورى مالیکى، سەرۆکى هاوپەیمانیى دەوڵەتى یاسا؛ خەمیس خەنجەر، سەرۆکى هاوپەیمانى سەروەرى؛ حەیدەر عەبادى، سەرۆکى هاوپەیمانى نەسڕ؛ هادى عامرى ، سەرۆکى هاوپەیمانیی فەتح؛ فالح فەیاز، سەرۆکی دەستەی حەشدی شەعبی و قەیس خەزعەلی، ئەمینداری عەسائیبی ئەهلی حەق کۆبوونەوە.

 

یەکێک لە پێشنیازەکان ئەوەیە کە مووچەى مانگەکانى تەممووز، ئاب و ئەیلوولى هەرێمى کوردستان بنێردرێت تاوەکو ئەو کێشانەى ئێستا هەن چارە دەکرێن، یاخود مووچەى مانگەکانی داهاتووی ئەمساڵ بنێردرێت و لە یەکى کانوونى دووەمى 2024 یاساى بودجە وەک خۆى جێبەجێ بکرێت، لەو ماوەیەى کە لەبەردەستیاندایە هەر کێشە و گرفتێک هەیە لەبارەى پرسی نەوت لە یاسای بودجەدا چارەسەرى بکەن. 

 

بڕیارە یەکشەممە 17ى ئەیلوولی 2023، ئەنجوومەنى وەزیرانى عێراق کۆببێتەوە، بەپێى زانیارییەکانى پەیامنێرى رووداو لەو کۆبوونەوەیەدا بڕیار لەسەر میکانیزمێک دەدرێت بۆ خەرجکردنى مووچەى فەرمانبەرانى هەرێمى کوردستان لەگەڵ بڕەکەى و شاندى هەرێمى کوردستان داواى 775 ملیار دیناریان کردووە بۆ مووچەى فەرمانبەران بۆ ئەوەى لەگەڵ داهاتى ناوخۆ مووچە بدەن.

 

دواى ئەوەى یاساى بوجەى گشتیی عێراق لە 12ى حوزەیرانى 2023 پەسەند کرا، بەغدا تەنیا 598 ملیار دینارى رەوانەى هەرێمى کوردستان کردووە، لەکاتێکدا پشکى مانگانەى بە پێى یاساکە دەگاتە زیاتر لە 1.3 تریلیۆن دینار.