موقتەدا سەدر تۆمارێکى دەنگیى بڵاوکردەوە؛ "من محەممەدی مەهدی نیم"

 

رۆژی یەکشەممە، 14ـى ئایارى 2023، موقتەدا سەدر، رێبەرى رەوتى سەدر تۆمارێکى دەنگیى لە تویتەر بڵاوکردەوە و ئاماژەى بەوەدا، ئەو لەو کەسانە نییە چاکەى دڵسۆزان و خۆشەویستان و گوێڕایەڵانى پشتگوێ بخات، خۆشى بە خزمەتکاریان ناو دەبات، بەڵام دەیەوێت لە رۆژگارێکى "خراپ" بەدووریان بگرێت.

 

موقتەدا سەدر گوتى: "دەمەوێت خۆم و لایەنگرانم بەرى بکەم لە هەڵسوکەوتى خراپەکاران کە خاوەنى بیروباوەڕى لادەرن، ئەوانەى بانگەشەى ئەوە دەکەن کە من ئیمامی مەهدیم، ئەوە قسەیەکى مەترسیدار و درۆیە، من نە بانگەشەم بۆ ئەوە کردووە نە بۆشم هەیە ئەوە بکەم، یان هەرکەسێکى دیکە ئەو بانگەشەیەم بۆ بکات".

 

رۆژی 14ى نیسانى 2023 موقتەدا سەدر هەژمارى تایبەتى خۆى لە تویتەر داخست و رایگەیاند، بۆ ماوەى ساڵێک رەوتەکەى سڕ دەکات، وەکو کاردانەوەیەک بەرامبەر بانگەشەى گرووپى "ئەهلى قەزیە" کە گرووپێکى نزیکی رەوتى سەدرن و بانگەشەى ئەوەیان کرد، هاوکات لەگەڵ خەڵوەتگرتن لە مزگەوتى کوفە بە بڕیارى موقتەدا سەدر، ئیمامى مەهدیی شیعەکان دەردەکەوێت کە 12هەمین ئیمامی شیعەکانە، کە مەبەستیان موقتەدا سەدر بوو.

 

سەرۆکى رەوتى سەدر گوتى: "باشترین سزا بۆ ئەو گرووپە دووڕووە و پاڵپشتیکارانیان و میلیشیا قێزەونەکان کە ئامانج لێى تێکدانى یادى شەهیدکردنى  محەممەد سادق  سەدرە"

 

محەممەد سادق سەدر، باوکى موقتەدا سەدر لەگەڵ دوو کوڕیدا لە 19ى شوباتى 1999 لە شارى نەجەف کوژران و بەرپرسیانى دەسەڵاتى حیزبى بەعس تۆمەتباردەکرێن بە کوشتنیان، بەگوێرەى مانگى کۆچى، یادەکە بۆ ئەمساڵ دەکەوێتە 24ى ئایار.

 

موقتەدا سەدر گوتى: "وەک ئەمیندارى گشتیى مەرقەدى شەریف، سەرجەم رێوشوێنەکانى ماتەمینى نەجەف بۆ ئەمساڵ رادەگرم و بۆ ماوەى پێنج رۆژ مەزارەکە دادەخەم، کەس بۆ زیارەتکردن نەیەت بۆ نەجەف".

 

 لە دواى 14ى نیسانەوە، ئەمە یەکەمجارە موقتەدا سەدر تویتەرەکەى بەکاربهێنێت. سەدر دەڵێت: "پێم باش بوو ئەمجارە تۆمارەکە دەنگى بێت نەک ڤیدیۆیی، بۆ ئەوەى پەیامەکە رەوانتر بێت."