لیژنەی سەلامەتیی نیشتمانیی عێراق داوا دەکات هاوردەکردنی ئۆتۆمبێل سنووردار بکرێت

زیاد قەیسی، بەڕێوەبەری پەیوەندییەکان و راگەیاندنی بەڕێوەبەرایەتی گشتیی هاتووچۆی عێراق بە تۆڕیی میدیایی رووداوی راگەیاند "لیژنەی سەلامەتی نیشتمانی، کە بریکاری وەزیری ناوخۆ سەرۆکایەتی دەکات و بە ئەندامیێتیی وەزارەتی گواستنەوە، بازرگانی، ئاوەدانکردنەوە، رێگاوبان، ئەمینداریێتیی بەغدا و ئەنجوومەنی وەزیران. رەزامەندییان لەسەر کۆمەڵێک راسپاردە داوە".

 

قەیسی گوتیشی یەک لەو راسپاردانەی رەزامەندییان لەسەر دراوە، مەرجدارکردنی هاوردەکردنی ئۆتۆمبێلە، داوا لە وەزارەتە پەیوەندیدارەکان دەکرێت هاوردەکردنی ئۆتۆمبێل بە کۆمەڵێک یاسا و رێنمایی تازە سنووردار بکرێت. هەروەها رەزامەندی دراوە لەسەر گەڕانەوەی سیستمی لەنێوبردنی ئۆتۆمبێل بۆ پێدانی ژمارە بۆ ئۆتۆمبێلی تازە. 

 

بەپێی دوایین ئاماری وەزارەتی پلاندانانی عێراق، لە ساڵی 2022 زیاتر لە 7 ملیۆن و 460 هەزار ئۆتۆمبێلی کەرتی تایبەت لە عێراقدا هەبووە.