خێزانێکی هەژار لە موسڵ: نایلۆن و قوتوو کۆدەکەینەوە و پێی دەژین
رووداو دیجیتاڵ
لە گەڕەکی سەماح لە رۆژهەڵاتی شاری موسڵ، خێزانێکی هەژار و کەمدەرامەت لەنێو خانوویەکی کەلاوەدا دەژین، خالیدە هەشت منداڵی هەیە و هاوژینەکەی لە کاتی شەڕی داعش گیانی لەدەستداوە و دەڵێت، "نایلۆن و قوتوو کۆدەکەینەوە و پێی دەژین."
ئەو خێزانە لە دۆخێکی سەختدا دەژین و بە ئەستەم بژێویی رۆژانەیان پەیدا دەکەن، گلەیی لە دۆخی خراپی ژیانیان دەکەن و دەڵێن، "خواردنی ئەمڕۆیان تەنیا مەنجەڵێکی نیسک بووە". خالیدە حەسەن، کابانی ماڵ بە رووداوی گوت، "من ئەوان بەخێو دەکەم، نایلۆن و قوتوو کۆدەکەینەوە و بژێوی خۆمانی پێ دابین دەکەین، ئەم کوڕەم لاڵە و ئەوانی بچووکتریش دەچنە قوتابخانە، ئەم کچەشم لە ماڵ دانیشتووە. ئەمە دۆخی ژیانمانە و کاتێک باران دەبارێت ماڵمان دڵۆپە دەکات."
کوڕی گەورەی ئەو خێزانە تەمەنی 17 ساڵە و توانای قسەکردنی نییە، براکەشی کە لەو بچووکترە، قوتابخانەی جێهێشتووە بۆ ئەوەی بژێویی خوشک و براکانی دیکەی دابین بکات.
ئەحمەد عەباس، کرێکارە و باسی لەوە کرد، "لەو کاتەی داعش هاتنە ئێرە، منیش تەمەنم گەورە بوو و خوێندنم جێهێشت، من کرێکاری دەکەم و لەگەڵ وەستایەکی سپیکاریی کار دەکەم، رۆژانە 10 تاوەکو 15 هەزار و هەندێکجاریش هەفتانە پارەم دەداتێ."
زۆرینەی ئەو منداڵانەی لە بازاڕی یونس پێغەمبەر لە موسڵ کاردەکەن، بێ باوکن و داهاتی ماڵەوەیان لەسەر ئەوانە. لەو بازاڕە نەک تەنیا منداڵ، بەڵکو گەنج و بە تەمەنەکانیش بەهۆی نەبوونیی و هەژارییەوە، هەر کارێک هەبێت بە ناچارییەوە دەیکەن.
ئەیمەن رەعد، کرێکارێکی دیکەیە و ئاماژە بەوە دەکات، "ئەوە چوار ساڵە لێرە کۆڵبەری دەکەم، رۆژانەم لەنێوان هەشت بۆ 10 هەزارە."
بەگوێرەی ئاماری وەزارەتی پلاندانانی عێراق، هەرسێ پارێزگای ئەنبار، سەلاحەددین و نەینەوا رێژەی هەژاری تێیاندا لە سەرجەم پارێزگاکانی دیکەی عێراق زیاترە، هەر بەگوێرەی ئامارەکە، تەنیا لە پارێزگای نەینەوا ئەو منداڵانەی کە تەمەنیان لە هەشت ساڵ کەمترە، ژمارەیان 197 هەزار منداڵە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ